"Ita-nia progresu ezekusaun orsamentu ba Ministériu Ensinu Superior nian ita atinje ona 56,6%, ne'ebé mak ita ezekuta. Purtantu, kuandu ita halo komparasaun, ita tama iha faze normál. Tanbasá mak ita iha ezekusaun ida ne'e sei to'o iha ne'ebá, tanba de'it ho situasaun Covid-19 ita-boot sira akompaña”, dehan Ministéru Ensinu Superior Siénsia no Kultura (MESSK), Longuinhos dos Santos, hafoin sorumutuk ordináriu iha Palásiu Governu, kuarta (15/09). 

Maibé, MESSK iha prediksaun ba kuatru tri-semestrál ba ezekusaun orsamentu, sira hakarak atinje to'o pursentu 89 (89%), tanba sira-nia ezekusaun orsamentu barak liu iha kuartu tri-semestrál.

"Ezekusaun ida ne'ebé mak ba kuatru tri-semestrál nian primeiru, barak liu mak ezekusaun ba prezervasaun uma-lulik no grupu kulturál nian, tuir mai mak iha prosesu asesu engresu, ne'e ho montante ne'ebé mak boot oituan", hatete nia.

Enkuantu, espetativa katak, to'o iha fulan-Outubru bele atinje iha pursentu 70 (70%), no ba to'o dezembru bele atinje to'o pusentu 89 (89%).

"Ohin ha'u hatete ona, ho situasaun pandemia Covid-19, limite ministériu, liliu Ministériu Ensinu Superio Siénsia no Kultura atubele halo movimenta ba munisípiu atu halo ezekusaun ita-nia programa. Tanba ne'e mak ita sei tarde oituan. Maibé, espera ke ita iha prediksaun ida, ita-nia análiza katak sei atinje 89%", afirma nia.

OJE 2020 ne’ebé aloka ba MESSK ho totál pur-volta 6 millaaun. Nune’e mós ba fundu dezenvolvimentu kapitál umanu nian, iha predikasaun orsamentu ne'ebé tama iha KROP (Komite Revizaun Orsamentu no Polítika), tetu fiskál ne'ebé simu inklui ho adisionál, pur-volta US$19,478,733. (*)