"Dadus kooperativa finanseira Timor-Leste to'o fulan-Agostu 2021 ne'e, hamutuk 70. Kooperativa ho kondisaun ativu iha 59, no pasivu iha 11. Husi totál númeru ne'e, estabelese ona iha Postu Administrativu 41, no Postu hamutuk 24 mak seidauk eziste", dehan Diretór Nasional Dezenvolvimentu Kooperativa, Reinaldo Borges, liuhusi dokumentu ofisiál ne'ebé www.tempotimor.com asesu, kinta (09/09).

Kooperativa finanseira (kréditu uniaun) sira ne'ebé eziste ona iha munisípiu Aileu 1, Ainaru 3, Baukau 6, Bobonaru 4, Covalima 2, Dili 4, Ermera 4, Lautein 3, Likisá 1, Manatutu 3, Manufahi 3, Vikeké 4, no Rejiaun Administrativa Espesiál Oekussi Ambeno (RAEOA) 3.

Hosi Postu Administrativu hamutuk 65 ne'e, postu 41 mak eziste ona, maibé sei hela 24, enkuantu husi kooperativa finansera hirak ne'ebé eziste ona, iha 61 mak sei ativu, no 11 ladun ativu.

Tanba ne'e, SEKoop iha kompromisu boot atu reativa hikas kooperativa sira ne'ebé mate, bele moris fali, ho programa edukasaun, formasaun no informasaun, hodi bele dezenvolve liután kooperativa sira hotu bele iha nia estabilidade finanseira ba tempu naruk.

Haree ba politika Governu ne'ebé, SEKoop planeadu ba futuru sei instala mós kooperativa finanseira no produsaun iha kada postu administrativu sira hotu. (*)