"Sim MSSI ita simu pakote US$18.4 milhões ita halo ezersisiu enterna hanesan ohin ami aprezenta ona katak tinan oin MSSI sei lansa programa projetu pilotu, ida ba bolsa da mãe jerasaun foun, ho ida ne'e maka 18.4 milhões ne'e la to'o, ami husu tán adisionál purvolta de US$6 milhões", dehan Vise Ministra Solidaridade Sosiál no Inkluzaun, Signi Chandrawati Verdiál, iha salaun Ministériu Finansa (MF), Aitarak-Laran, sábadu (04/09).
Husi proposta audisionál ho valór tokon US$6 ne'e atu implementa programa pilotu ba bolsa de mãe jerasaun foun ba iha munisípiu Ainaro, Bobonaro no Rejiaun Administrativa Espesiál Oekussi Ambeno (RAEOA), tanba dekretu lei ne'e hetan ona aprovasuaun husi konsellu Ministru (KM).
Maske, MSSI laiha programa tinan oin nian, maibé MSSI mós tau ona pakote nutritivu no pakote destore atu haree ba akontesimentu dezastre no kalamidade boot sira ne'ebé mosu, inklui mós ba inan isin-rua no la barik sira no grupu vulnerável sira seluk hanesan defisiénsia nomós ferik katuas sira.
Maibé projetu pilotu ne'ebé MSSI tau prioridade iha munisípiu tolu, tinan 2022, posibilidade sei kontinua, se kuandu projetu pilotu ne'e fó impaktu di'ak ba saúde no nutrisaun inan ho oan.
Tuir planu, programa pilotu bolsu da mãe ne'e, iha tinan 2022 sei implementa uluk ba munisípiu tolu, no 2023 ba munisípiu lima, nomós 2024 ne'e ba munisípiu haat, inklui mós ba munisípiu Dili iha tinan 2025. (*)