"E ami espera katak Governu liuhusi Ministèriu Obras publika, Ministériu Asuntu Kombatente Libertasaun Nasionál, no Ministériu Turizmu bele haree koordena para depois bele haree fatin sira ne'e atu identifika fatin hothotu para bele sai hanesan fatin istóriku no fatin turizmu", dehan nia iha plenária Parlamentu Nasionál (PN), tersa (31/08).
Bankada Fretilin apresia Governu ne'ebé lidera husi Primeiru Ministru (PM), Taur Matan Ruak, konsege realiza ona vizita ba fatin istóriku sira liliu iha Foho Matebian Feto no Mane iha Postu Administrativu Kelikai, Munisípiu Baukau.
Tanba iha foho matebian feto ne'e iha fatin istóriku barak, hanesan Cristu Rei, ne'ebé sai hanesan fatin istóriku ida iha foho matebian feto.
Aleinde mós fatin istóriku iha foho matebian Mane nia okos, ne'ebé konsidera hanesan istóriku tanba momentu ne'ebá sai subar fatin, Komandante Daitula nian, iha suku Darnafa-Namanei, maibé kondisaun estrada la di'ak.
"Tanba ne'e ami husu ba Governu bele haree tok dalan sira ne'e ba to'o iha Darnafa-Namanei", hatete nia.
Iha mós rai moris fatin husi Dom Carlos Filipe Ximenes Belo, luta ba ukun rasik-an. Maske oras ne'e nia la husu ninia diretu hanesan ema veteranu, tanba nia ema relijiozu ne'ebè kuiñesidu iha internasionál.
Maibé pelu menus Governu haree netik estrada sira ne'ebé liga ba nia moris fatin iha Kelikai, tanba estrada to'o agora nia kondisaun aat ona, no presiza hadi'a. (*)
