"Durante ha'u-nia mandatu, ha'u iha esforsu lubuk ida kona-ba ita-nia komunidade sira tanba laiha liña eletrisidade, entaun ita-nia komunidade sira balu iha kbi'it liu, sira hola Solar painel, balu ne'ebé laiha kbi'it, pasiénsia sira tenke uza lampu, uza lilin para ajuda oan sira hodi estuda kalan", informa Xefe Suku Fahilebo, Marcelino da Cruz, iha Sede Suku Fahilebo, segunda (30/08).
Tanba iha Suku Fahilebo komunidade nia preokupasaun mak kooperativa bele hari'i, maibé laiha liña eletrisidade. Tanba durante ukun-an, atu besik tinan 20 resin ona, komunidade Fahilebo seiduak asesu ahi.
Maske ho totál populasaun hamutuk 1.646 ho uma-kain 321, ne'ebé sei kontinua izoladu hanesan Aldeia Fatunesu, Tohileten, no Tohikraik.
Iha tinan rua tuir malu 2019 ho 2020, lori ona proposta ba hato'o ona iha Eletrisidade Timor-Lesre (EDTL), maibé realidade to'o oras ne'e nafatin laiha rezultadu.
Kona-ba asuntu saúde, nia dehan sufisiente, tanba pesoál saúde kompostu husi emfermeiru na'in-1, dourtor 1, ho parteira na'in-1, ne'ebé kada loron fó atendimentu saúde ba komunidade sira iha Fahilebo.
"Ha'u preukupa liu mak estrada, tanba ita hotu haree katak, iha tempu bailoron, rai-uut hanesan abu-abu, entaun ida bele prejudika komunidade sira-nia saúde, bele hetan moras (ispa). Ho nune'e mak ami esforsu ona, ami hato'o ona ba diresaun Obras Públika ninian, maibé to'o agora la hetan rezultadu", hatete nia.
Aleinde ne'e, iha loron 06 fulan-Jullu foin lalais ne'e, hato'o ona problema sira ne'e ba Sekretáriu Estadu Komunikasaun Sosiál (SEKOMS), Mericio Juvinal dos Reis Akara, maibé seidauk iha rezultadu. (*)
