"Implementasaun ba programa refere hahú ona hodi hein reasaun husi públiku atu hatama proposta no orsamentu loja ba povu Governu tau purvolta 100 mill ba tinan ida ne'e, e sei kontinua ho orsamentu ba diversifikasaun ai-hán rihun US$42,700", dehan Ministru Turizmu Komersiál Industria (MTKI), José Lucas do Carmo da Silva, iha Bebora, kinta (28/08).
Tanba ne'e, MTKI selebra akordu ho parseiru internationál rua hanesan United Nations Development Programme (UNDP) ho World Food Programme (WFP) hodi haree ba implemetasaun programa refere.
"Ita konsege asina akordu ho instituisaun rua World Food Programme (WFP), United Nations Development Programme (UNDP) atu haree kona-ba asuntu diversifika ai-hán, no ekonomia nian", hatete nia.
Iha asina akordu ne'e UNDP haree kona-ba oinsá atu hola parte iha programa fortifikasaun ai-hán ne'ebé mak Ministéiru atu loke ba públiku maibé hakarak UNDP hola parte prosesu ba selesaun.
"Ita halo ho WFP kona-ba loja ba povu ho konseitu Governu anteriór, agora ita buka redezeña nia konseitu ne'e e parte WFP nia sei iha responsabilidade iha prosesu selesaun ne'e rasik nomós sira iha prosesu dezeñu ba loja ba povu ne'e rasik iha Munisípiu balun", esplika nia.
Ho programa ne'e tuir planu sei establese uluk iha tinan 2021 ne'e, hamutuk 5 ka 6, maibé sei iha kontinuasaun nafatin.
Ba benefisiáriu ne'e loke ba públiku no sira ne'ebé interesadu hakarak atu envolve iha diversifika ai-hán ba grupu kreativu sira, grupu ekonomia produtivu iha agrikultura, peska, pekuária no teknolojia.
"Ne'e nakloke sira tenke tau esforsu ba kualidade sira-nia proposta, tanba selesaun sei bazea ba kritéria sira nune'e mós programa loja ba povu", dehan nia.
Reprezentative and Country Director World For Programme, Degeng Liu rekoiñese, agradese ba Governu Timor-Leste, ajuda WFP hodi sosa vitamina minerál nia musan no sei kahur ba produtu lokál ne'ebé sei fó ba eskola sira hodi responde ba má nutrisaun.
"Agradese tebes tanba Governu Timor-Leste fó rihun US$100, atu hola vitamina minerál nia musan ne'ebé sei kahur ho fós lokál iha Timor-Leste nian, hodi bele responde ba problema má nutrisaun liliu defiseinsia mikro nutriente", dehan nia.
Programa ida ne'e ho investimentu ne'ebé ki'ik tebes maibé nia retornu ne'e boot ba asuntu má nutrisaun iha rai laran.
"Timor ne'e ita hatene ba hahán halo ita-nia kabun bosu de'it, liliu hahán ne'ebé riku ho enerzia de'it ne'e ita Timor bele maibé atu hetan protein ho mikro nutriente ne'ebé mais razoavel ou mais sufisiente liu atu ba ita-nia isin ne'e, liliu ba nutrisaun nian ne'e hanesan dezafiu boot liu iha rai ida ne'e, tanba ne'e mak ita koko atu introduz programa ida ne'e", hatete nia.
Pilotu programa ne'e sei la'o iha Dili ho eskola lima ne'ebé selesionadu husi Ministériu Edukasaun, ho durasaun tinan ida hafoin ba Munisípiu sira. (*)
