"Kooperasaun ida ne'e, kona-ba programa dizitalizasaun ba Kréditu Union sira, nomós parte ida husi programa inkluzaun finanseira ne'ebé atu povu Timor-Leste bele asesu no asesu ba finanseira iha Timor-Leste", esplika Sekretáriu Estadu Kooperativa (SEKoop), Elizário Ferreira, iha Otél Timor, kinta (26/08).
Programa dizitalizasaun ne'e, faze primeiru sei oferese uluk ba kooperativa kréditu Uniaun hamutuk 25, no iha faze seluk mai, sei kobre to'o kooperativa kréditu hothotu ne'ebé mak resjistu iha Kooperativa Kréditu Federasaun Hanai Malu (FMH).
Tanba FHM mak tau matan ba Krédit Union iha TL hodi bele dezenvolve di'ak liu tan sistema finanseira ida ne'ebe di'ak, ba povu, nomós ba membru kooperativa sira.
"Dizitalizasaun ida ne'ebé mehi ne'e, ema bele uza ba rai osan, uza ba foti osan, empresta osan, bele mós uza ba sosa sasan sira iha loja. Atubele uza ho telemovel, bele transfere osan. Ida ne'e mak programa dizitalizasaun ne'ebé parte SEKoop servisu hamutuk ho UNCDF atu asisténsia ba kréditu uniaun, servisu hamutuk mós ho telemor Sintex atubele aselera didi'ak servisu ida ne'e", dehan nia.
Jestór Programa, UNCDF Pacific Digital Programme, Bram Peters informa, UNCDF lansa ona projetu ida hodi dijitaliza prosesu pagamentu sindikatu sira iha TL no hametin ekosistema servisu finanseiru dijitál nian iha país ne'e.
UNCDF sei fó apoiu finanseiru no tékniku ba Sekretaria Estadu Kooperativa (SEKoop), nu'udar órgaun governamentál ne'ebé iha responsabilidade atu halo supervizaun no regulasaun ba kooperativa sira iha Timor-Leste, hodi hala'o atividade hirak ne'e.
"Projetu ne'e nia objetivu mak atu fornese sindikatu kréditu ho plataforma pagamentu dijitál hodi kanaliza rai, dezembolsu husi empréstimu, no atu selu fali empréstimu ho seguransa no konveniente ba ninia membru sira", nia afirma.
Projetu ne'e tama iha programa foun ida ho títulu "Finansas Digital ba rezilénsia iha país Áfrika, Karaíbas no Pasífiku" (DF4Res) no hetan finansiamentu husi Uniaun Europeia, ho objetivu prinsipál mak atu dezenvolve solusaun dijitál inovadór sira ne'ebé bele hakbesik liután servisu finanseiru ba Uma-kain sira ne'ebé ho rendimentu ki 'ik no komunidade marjinalizadu sira iha TL.
"Sei hala'o avaliasaun impaktu regulár atu informa atividade projetu nian sira no hatudu realizasaun no lisaun hirak ne'ebé aprende ona, no mós asegura transferénsia koñesimentu entre parseiru, doadór sira, no inisiativa sira seluk ne'ebé hanesan iha mundu tomak", tenik nia Jestor UNDCF ne'e.
Embaixadór Uniaun Europeia ba Timor-Leste, Andrew Jacobs hatete, digitalizasaun hanesan prioridade ida husi UE no hanesan elementu estratéjiku ida husi ita-nia Programa Anuál Multi Anuál foun ho Timor-Leste, ne'ebé sei kobre períodu tinan 2021 to'o 2027.
"Digitalizasaun sei sai fundamentál iha dezenvolvimentu setór privadu no formasaun ba foinsa'e sira, maibé mós sai instrumentu fundamentál ida iha jestaun rekursu naturál sira, jestaun finansa públika no servisu sosiál sira", Embaixadór Andrew hakotu.
Enkuantu, SEKoop kontratu ona Telemor Fintech, nu'udar fornesedór rede movel boot Timor-Leste nian, atu dezenvolve plataforma baze movel ne'ebé sei apoia membru uniaun kréditu sira atu tranzmite ho efisiente liután. (*)
