"Ne'e mak hodi bainhira hau hatete katak, ita Timor ne'e hanesan malisan boot ida mai ita, malisan boot ne'e tanba saida, ita gasta osan ne'e para inves de sosa buat foun ida mai para ita utuliza buat ne'e iha tempu naruk nian la'e, sosa mak buat dodok ninian", dehan Deputadu Domingos de Carvalho iha parlamentu Nasional, segunda (23/08).
Tanba informasaun ne'ebé CNRT simu, Ró Haksolok sei gasta orsamentu ho totál hamutuk tokon US$57 mak foin bele finaliza hodi lori ne'e mai Timor-Leste.
Ho ida ne'e, osan tokon US$ 14, ne'ebé Governu prevé iha Orsamentu Jerál Estadu (OJE) 2021 ne'e seidauk to'o, tanba tuir informasaun presiza aumenta tan tokon 13 hodi kompleta ba tokon US$27, atubele sosa asaun husi kompaña.
Maibé, antes ne'e estadu gasta ona osan hamutuk tokon US$30 resin, no osan ne'ebé dadauk sira presiza tan atu sosa asaun ne'e hamutuk tokon US$27, maibé iha tinan 2021, Governu lori de'it US$14 milaun ba Parlamentu Nasionál.
"E Osan ne'ebé mak loloos para knona-ba Ró ninia atu remata para lori mai ne'e, hamutuk millaun US$5,779, mak nia foin bele mai", dehan nia.
Tanba ne'e, CNRT nota katak iha Orsamentu Jerál Estadu 2022, Governu sei tau tan tokon US$13 atubele kompleta osan tokon US$ 14 ne'ebé antes ne'e prevé ona iha OJE 2021.
"Bainhira Amu Bispu halo inugarasaun ba Ró (haksolok) ne'e nia laran didin ho triplek dodok, maibé ninia kustu ne'e loloos ne'e, (cinquenta e sete ponto setenta e nove) milhões", dehan nia.
Bankada CNRT nu'udar opozisaun hakarak husu atubele halo investigasaun ba prosesu Ró Haksolok nian tanba kondisaun la di'ak maibé estadu lakon osan boot. (*)
