"Ha'u atu informa de'it katak, dadus ne'ebé ha'u iha, ba tinan ida ne'e (2021) iha 684 estabelesimentus ne'ebé kontrola husi Jullu, informasaun ne'ebé tama, iha duni infratór balu ne'ebé viola lei, balu mós lisensa mate, maibé ho razaun katak lisensa mate tanba iha buat ida pandemia Covid-19, entaun sira mós la biban para halo trata", hatete Inspetór Jerál AIFAESA, Ernesto Monteiro, iha kna'ar fatin, Matadoru, segunda (22/08).
Nune'e mós iha restaurante balu mak nia kondisaun sira ladun di'ak, produsaun kona-ba bee-moos ne'ebé ninia kondisaun la di'ak, no oras ne'e sira halo hela prosesu tuir lei ne'ebé vigóra.
"Ne'ebé iha 684 ne'e kuaze 40 itál ne'ebé ami tenke halo prosesu ba sira, tanba sira iha indikasaun halo infrasaun, vióla lei. Maibe, ida ne'e liuhusi prosesu ida, oras ida sei iha prosesu ne'e ninia lala'ok, kuandu iha kontrola ka halo fiskalizasaun ba terrenu, ida kuandu akontese, sei halo relatóriu mai iha inspetór jerál tenke ba despaixu ba jurídiku para bele notifika sira mai halo investigasaun, e dopois sira hato'o relatóriu filafali ba inspetór jerál para bele análiza razoens sira ne'ebé aprezenta, mak bele fó sansaun", esplika nia.
Tuir lei sanitária nian, bainhira empréza ruma hakarak loke sira nia negósiu tenke iha kondisaun di'ak, moos no seguru.
"Ninia infrasaun ne'e iha oioin, tanba tuir lei ne'e, liu prazu mós ne'e labele, lisensa tenke iha e sasán labele estragu, ninia kondisaun tenke di'ak, nomós ba restaurante sira ne'e karik tenke presiza moos", afirma nia. (*)