“Sim iha Aldeia ida mak seidauk asesu ba bee-moos, maibé o restu ne'e asesu hotu ona, nune'e husu ba parte relevante sira atu haree mós ba ida ne'e, tanba ha'u-nia ema sira ne’e tenke la'o dook mak foin bele kuru bee-moos”, dehan Xefe Suku Saelari, Mateus Cardoso liuhusi telfone, sábadu (21/08).
Bainhira tempu bailoron hanesan ne'e Komunidade sira tenke la'o dook hodi bele hetan bee-moos no uza ba sira-nia nesesidade, tanba ne'e husu ba parte relevante sira atu tau atensaun ba komunidade sira iha área rural.
Maske nune'e Líder komunitáriu ne'e la ezije tebes ba Governu maibé husu atu haree no rezolve ba problema ki’ik sira hanesan ne'e, atu nune'e labele hamosu dezentendimentu iha suku.
Entretantu totál populasaun suku Saelari hamutuk 2.731, ho nia aldeia 9 totál uma-kain 545. (*)