Sekretáriu Jerál Asosiasaun Misaun Antigu Kombatente iha Timor-Leste, João Evangelinho dos Santos de Araujo hatete, programa to’os komuna ne'e fahe ba oin rua, hanesan to’os iha rai maran no to’’os rai bokon hanesan natar, ne'ebe bele kuda aimanas, kuda haree, kuda batar, kuda modo, kuda buat oioin ne'ebé mak ema presiza atu sosa.
“Dezenvolvimentu primeiru mak ami hahú ho kria to'os Komuna, ida ne'e oinsá bele ajuda ami-nia membru atu hatene mekanizmu servisu”, dehan João iha nia kna’ar fatin Seroja, Komoro, sábadu (14/08).
Ho rezultadu servisu ne'e, Asosiasaun Misaun Antigu Kombatente iha loron domingu (14/08) selebra anversáriu ba dahuluk.
Asosiasaun ne'e rasik, hetan tranformasaun husi Asosiasaun Antigu Kombatente FALINTIL (AAKF) iha loron 14 fulan-agostu tinan 2020 no asosiasaun ne'e rasik sei esforsu atu halo parseiru ho Governu oinsá aprezenta relatóriu servisu.
Tanba ne'e, asuntu ne'ebé sai prioridade ba AMCA iha tinan 2021, mak oinsá atu kontinua fasilita membru sira munisípiu, tanba papel asosiasaun ne'e, sosiu hamutuk, soe hamutuk, tau hamutuk hodi halo prosesu, ne'e hanesan programa ne'ebé asosiasaun refere hala'o dahuluk iha tinan 2020.
“Programa lubuk ida mak hanesan ohin ha’u hato'o ne'e ba programa rua, to’os komuna rai-maran, pois to'os rai bokon hanesan (natar), ami-nia rezultadu iha tiha ona 16 tonelada, hodi tau hela iha ami-nia sede ne'ebé mak ita estabelese tiha iha munisípiu sira”, esplika nia.
Durante ne'e, Asosiasaun Kampneza Traballador Timor-Leste (AKTTL) ne'ebé kontribui fahi inan haat no aman ida, ba Asososiasun Misaun Antigu Kombatente hanesan programa pilotu dahuluk ne'ebé asosiasun rua ne'e halo.
Bainhira asosiasaun hamrik mós sira komesa halo kooperativa, no servisu hamutuk ho Governu iha lorom 14 abril 2021, wainhira mosu inundasaun iha loron 4 fulan abril tinan 2021.
“Entaun iha ne'eba ema dehan be dezastre naturál, entaun ami komesa foti desizaun, ami bele ba halo limpeza jerál ida iha Palásiu Prezidente Repúblika iha Ailok Laran”, afirma nia.
Ho progresu servisu ne'ebé mak asosiasaun ne'e halo iha munisípiu hahú husi tinan 2020-2021, membru sira la konsege aprezenta relatóriu servisu, tanba kumpre regra estadu emerjénsia, ka serka sanitária.
Situasun ne'e sai dezafiu boot ba AMAC, maibé liuhusi liña telefone AMAC sempre fó hatene ba ninia membru iha munisípiu atu kontinua halo servisu hanesan babain. (*)
