"Ami hanoin, ida agora ne'e la'o ladun sufisiente, hanesan ohin ami hato'o preukupasaun ba SEKoop sira, tanba ho impaktu mós husi moras Covid ne'e mak ami-nia konstrusaun sira mós la'o ladun di'ak, ami ladun hetan osan halo konstrusaun sede ne'e la'o ba oin, tanba dalan ligasaun ba Munisípiu sira taka, e susar atu buka moris. Entaun, ida ne'e mak ami preukupa hodi kestiona hela ba SEKoop sira, atubele suporta ami”, dehan Abríl Binamu Simões, iha Suku Seloi Malere, sábadu (14/08).

Aleinde ne'e, preukupasaun seluk ne'ebé sira hasoru menus rekursu umanu hodi difikulta sira labele halo jestaun osan ho di'ak.

Tanba ne’e, husu ba SEKoop atubele suporta sira liuhusi treinamentu nune'e bele kapasita abilidade membru sira-nian hodi sustenta moris naruk ba loron aban bainrua nian.

"Difikuldade rekursu limitadu, maske osan ne'ebé barak, maibé ami laiha kapasidade oinsá atu uza osan sira ne'e. Tanba ne'e ami husu ba SEKoop atubele ajuda ami hodi haree ba rekursu hirak ne'ebé iha. Fallansu iha parte akontabilidade nian”, informa nia.

Sekretáriu Estadu Kooperativa (SEKoop), Elizário Ferreira hatete, husi kooperativa hamutuk 103 ne'ebé eziste ona iha Timor-Leste, membru sira hasoru problema ne'ebé hanesan iha asuntu abilidade kona-ba jestaun no kontabilidade.

Nune'e, dezafia dirijente no membru sira iha kooperativa atu prepara pedidu formal ida kona-ba difikuldade sira, hatoo ba nia gabinete, molok atribui apoiu ruma.

"Vizita ida ne'e atu fó korajen ba ita-boot sira atubele aselera filafali ita-boot sira-nia kooperativa. Normalmente, SEKoop atu fó apoiu ba membru kooperativa sira ne'e, boot liu mak ho valor rihun US$7 hodi hari’i sede kooperativa”, hatete nia.

Maske nune'e, promete iha tempu besik sei orienta ekipa formadór sira realiza formasaun ba membru sira oinsá bele eleva kapasidade ema no instituisaun nian ba oin la'o di'ak, tanba SEKoop nia programa esensial atu sustentabiliza ba kooperativa ida, tenke liuhusi edukasaun, formasaun ho informasaun. (*)