Koordenadora Eskola Báziku Filiál (EBF) 12 Outubru, Filomena Casmira hatete, husi totál uma-ka'in haat ne'e, rua mak hetan afeta inundasaun maka'as, no uma-kain rua seluk, ne'ebé mak sei hela iha EBF 12 Outubru, tanba sira enfrenta problema oituan liga ba iha uma mahon.

Tanba ne'e, Organizasaun Noun Govermentál (ONG) balun hamutuk ho autoridade lokál orienta sira atu kontinua hela iha eskola refere.

“Sim, vítima hirak ne'ebé mak sei hela iha EBF 12 outubru, hela uma-kain haat. Husi abitante 28 ne'e tuir lista ne'ebé sira hato'o ma”, deklara nia, iha kna'ar fatin EBF Outubru, Tasitolu, sábadu (14/08).

Uma-kain haat ne'e, hela iha eskola EBF no utiliza sala ne'ebé estudante sira la uza tanba iha ne'eba sala simples no emerjénsia.

Maske EBF fasilita fatin ba vítima hirak ne'e, maibé sei la afeta ba prosesu aprendijazen, tanba aula ne'ebé estudante sira utiliza ne'e sufisiente hela.

“Ne'ebé laiha buat ida atu satia netik prosesu aprendijazen lala'o ne'e laiha”, afirma nia.

Enkuantu, vitima inundasaun ne'ebé evakua ba sentru EBF 12 Outubru Tasitolu, husi fulan-abril, hamutuk uma-kain 174, husi totál abitante 836.

Maibé husi hirak ne'e, uma-kain 170 konsege realoka ba sira-nia hela fatin, tanba ekipa konjunta, servisu hamutuk ho sekretáriu estadu protesaun sivíl, halo preparasaun no fasilita sira atu sai husi sentru evakuasaun iha EBF 12 Outubru. (*)