"Ami-nia preukupasaun iha Suku Hoholau ne'e, ida preukupa maka'as mak eletrisidade, durante preukupa tebes, estrada mós ami preukupa hela durante ne'e, buat hotu ita hatama hela, maibé buat ne'e ita hein hotu, e preukupasaun povu ne'e ita relata, ita hatama iha ne'ebá”, informa Xefe Suku Hoholau, Orlando Maia, ba www.tempotimor.com iha Administrasaun Munisípiu Aileu, sesta (13/08).
Kona-ba problema eletrisidade, sira preukupa kompaña barak loos mak tama iha Suku Hoholau, maibé kompaña sira mós dehan hein hotu desizaun husi Governu sentrál, no bainhira iha ona desizaun ruma, sira bele ona responde.
"Maibé, eletrisidade iha suku laran ne'e, ita dehan katak iha sede suku laran de'it, maibé aldeia lima ne'e seidauk hetan. Ida ne'e mak ita preukupa ita hatama, ita bolu kompaña sira la'o hela, maibé hanesan ohin ha'u dehan, ita hein husi leten. Sé kuandu leten mak dehan katak iha ona kompaña ne'ebé manán, prontu bele iha ne'ebá”, haktenik nia.
Aleinde ne'e preukupa konaba dezenvolvimentu seidauk tama ba suku ne'e, maibé ho problema pandemia globál Covid-19, difikulta mós komunidade sira atu hala'o atividade ekonómika ba Munisípiu no kapitál.
"Ita-nia povu presija hela buat ida dezenvolvimentu, maibé ita haree hela buat ida situasaun moras maka hanesan ne'e, ita hothotu parte ami hanesan autoridade, maibé buat hotu iha leten. Tanba ne'e, ita dehan katak, preukupasaun mak ne'e, ida primeiru mak ahi, e segundu mak dalan", informa nia.
Tanba iha tempu bai-loron, komunidade sira bele asesa ultrapasa ba merkadu munisipál hodi fa'an produtu kafé, modo, ho ai-farina, maibé tempu udan difísil ba komunidade sira atu liu.
“Ita konta dehan dezembru ba jeneiru ne'e susar tanba ita foin lalais dia (04/04) ne'e, ita haree mota balu lori hela karreta. Ida ne'e ami-nia preukupasaun mak ne'e”, hatete nia.
Autoridade lokál ne'e husu ba Governu atu loke matan ba sira-nia problema estrada ho eletrisidade, tanba tinan barak ona seidauk asesa.
Suku Hoholau, kompostu husi aldeia 5, iha Xefe família 374, populasaun hamutuk 1.824 (feto 867 no mane 957), área totál 1.672 kilómetru kuadradu, lokaliza iha Postu Administrativu Aileu Vila, Munisípiu Alieu. (*)