Ministru Prezidénsia Konsellu Ministru (MPKM), Fidelis Leite Magalhães hatete, liuhusi dekretu lei ne'e atu halakon limitasaun ba konstrusaun sivíl sira ne'ebé ho osan montante millaun US$7.5 ba leten
“Intervensaun ida ne'e importante tanba ho desizaun ida ohin konsellu de Ministru loke dalan ba empreza nasionál sira atubele kompete ba iha projetu sira servisu sira iha konstrusaun sivíl nian ne'ebé ho valor aas liu millaun US$7.5 nian”, dehan Fidelis iha Palásiu Governu, kuarta (11/08).
Husi dekretu lei ne'e hatur katak empreza nasionál sira mós iha direitu atu kompete ho empreza internasionál sira iha projetu sira ne'ebé montante liu millaun US$7.5.
“Antes ne'e projetu hothotu ne'ebé ho servisu ho montante boot millaun 7.5 ba leten ne'e karik empreza nasionál sira halo tenke konsorsiu ka parseria ho empreza internasionál, maibé ho desizaun ida ohin empreza timoroan sira mós karik bainhira sira iha kapasidade rasik komforme kondisaun ne'ebé dekretu lei ne'e hatur sira bele kompete hasoru empreza internasionál sira”, esplika Fidelis.
Alterasaun dahuluk ba Dekretu Lei ne'e aprezenta husi Ministru Obras Publika, Salvador Soares dos Reis Pires hakarak ho intervensaun legislativa ida ne'e hakarak eliminaa limitasaun ne'ebé uluk la permite empreza nasionál sira hala'o serbisu sira konstrusaun sivíl nian ho valór as liu Miliaun US$7.5. (*)
