Tanba sidadaun hirak ne’e hafoin kumpri kuarentina hotu, prosesu imigrasaun nian hala’o prosesu administrativu hodi fó sansaun multa tuir lei imigrasaun nian nomós dekretu governu númeru 18/2021, iha artigu 7, ne'ebé tenke fó sansaun multa ba sira.
“Iha ne'ebá, ami iha ona desizaun katak, foti desizaun sansaun multa ne'e másimu ba sira, foti koimas másimu ba US$250 ba sira, kada ema ida”, dehan Diretór Jerál Serbisu Migrasaun, Superintendente Asisténte, Luis Soares Barreto, iha kna’ar fatin Vilaverde, kuarta (11/08).
Husi aplikasaun multa ne’e, tanba sidadaun hirak ne'e dezobediénsia ba regra Estadu Emerjénsia no Serka Sanitária ne'ebé Governu aplika, ho dekretu Governu númeru.
Tanba sira hatene ona iha Timor-Leste sei aplika hela estadu emerjénsia labele hakat liu fronteira, tanba situasaun fronteira agora dadaun ne'e lockdown.
“Depois de multa, ami sei entrega sira ba parte polísia investigasaun nasionál hodi halo prosesu kontinuasaun asaun sira-nian. Ida ne'e kompeténsia iha parte serbisu investigasaun mak sei foti prosesu kontinuasaun”, esplika nia.
Entretantu, sidadaun timoroan hamutuk na’in-113 ne'e, Polísia Repúblika Indonézia nian kaptura iha loron segunda (09/08), maizumenus tuku 09:00 oras Indonézia nian. (*)