“Governu tenke kria kondisaun ba pesoál sira ne’ebé mak presta ona servisu iha liña frente. Ne'ebe favór ida, governu selu ema nia direitu sira ne'e”, dehan nia iha Plenária Parlamentu Nasionál (PN), tersa (10/08).
Tanba, deputadu sira hakat husi Dili ba Baukau haree no observa katak, pesoál sira liliu seguransa hala'o serbisu maka’as no bainhira deputadu liubá, sira sempre hato'o hela liamenon ba deputadu sira, atubele rekomenda hela ba governu selu ona subsídiu ba liña frente.
Tanba ne'e, governu tenke haree ona oinsá mak bele aselera lalais atu nune'e sira mós bele hetan diretu pagamentu.
“Ha’u foti ezemplu simples wainhira ita hakat husi Dili ba Baukau, ita haree ita-nia pesoál seguransa sira servisu maka’as teb-tebes iha dalan, maibé wainhira ita fila, sira hatene deputadu mak liu, sira sempre husu favor ida maun deputadu ko’alia netik iha parlamentu hatete ba governu selu ami-nia osan”, dehan nia.
Deputadu Bankada Uniaun Demokrátiku Timorense (UDT), Francisco David Carlos Xavier husu, ba governu tenke rezolve ona subsídiu ba liña frente.
“Se karik bele trata buat ne'e mais ráposivél, tanba sira husik sira-nia família, husik nia maun alin, oan sira tomak, dedika-an hodi salva povu ida ne'e nia vida, ida ne'e sira merese duni hetan”, dehan nia.
UDT sei mantein pozisaun hodi ejize tanba, ema sira ne’ebé servisu iha front line, hanesan saúde, PNTL no F-FDTL nomós front line sira seluk, to'o agora seidauk simu diretu ne'e.
Dadauk, dekretu lei ne’ebé governu aprezenta ba Prezidente Repúblika (PR), Francisco Guterres ‘Lú Olo’, hetan veta, tanba iha lei ida anterior ne'e válidu hela. (*)
