“Prezensa ADB nian fundamentál tebes atu konkretiza ami-nia programa Governu no atu implementa objetivu boot nasionál nian hodi kria eixu (ajuda malu) no polu foun sira dezenvolvimentu nian, ho ita-boot sira-nia tulun ami bele kria ona eixu rodoviáriu sira ne'ebé liga munisípiu sira iha Ponta Leste ba munisípiu no ba rejiaun sira ne'ebé dook liu, iha fronteira”, dehan Taur liuhusi komunikadu ne'ebé www.tempotimor.com asesu iha Ministériu Finansas, segunda (09/08).

Ho funsionamentu husi eixu/apoiu foun sira ne'e, bele estabelese ona konetividade foun sira, ne'ebé sei kontribui loos ba ambiente negósiu ida ne'ebé di'ak liu, iha kapasidade atu dada investimentu foun sira, parseria públika no privada foun sira iha munisípiu no rejiaun oioin pais ne'e.

“Ho ita-boot sira-nia tulun ami bele mós liga munisípiu sira iha norte, inklui kapítál Dili, ho Kosta Súl, ne ebé iha potensiál boot, iha ne'ebé, relasiona ho Projetu Tasi Mane, ami hakarak aproveita akordu ne'ebé ami asina ona ho Austrália kona-ba Tasi Timór, hodi aproveita potensialidade esplorasaun Greater Sunrise nian”, afirma nia.

Projetu sira ne'e iha ona faze investimentu nian, ho konstrusaun autoestrada ne'ebé sei liga Suai no Vikeké, ne'ebé hala’o hela ho objetivu atu transforma sentrál elétrika óleu pezadu nian ba sentrál gas naturál nian, ne'ebé di'ak liuba ambiente.

Parseria sira ne'ebé finansia husi ADB, iha tinan barak nia laran, kontribui ona ba konfiansa internasionál husi investidór sira no parseiru sira dezenvolvimentu nin iha Timor-Leste. (*)