“Tanba uluk Indonézia nia tempu ha'u rona dehan koperasi, agora kooperativa tanba ne'e ha'u hakrak tebes husu ba SEKoop loke programa ne'e iha ami-nia suku, tanba ami mós hakrak tebes ida ne'e, ami lakohi para rona de'it naran ne'e iha televizaun”, dehan Xefe Suku João Agostinho, kinta (06/08).

Tanba joven barak ne'ebé mak laiha kampu servisu iha suku Dato-Tolu, nune'e husu ba SEKoop atu loke programa kooperativa ne'e iha sira-nia hodi bele ajuda joven sira kria kampu servisu rasik.

“Ha'u dalaruma hare iha televizaun (TV), kona-ba joven sira tuir formasaun kooperativa nia no sira (formandu) iha sira-nia planu oioin de'it bainhira atu remata formasaun hodi ba implementa iha sira-nia suku, tanba ne'e mak ha'u mós hakarak husu ida ne'e hodi ajuda ha'u-nia joven sira”, afirma nia.

Hatan ba ezizénsia ne’e asesór SEKoop, Arlindo Marçal hatete, bainhira Xefe Suku Dato-Tolu hakarak SEKoop loke formasaun iha sira-nia suku, ba dalahuluk tenke iha ona joven sira ne'ebé fixu atu tuir formasaun, hafoin ekipa bele fó formasaun ba sira.

“Tanba ninia kondisaun mak hanesan ne'e, Xefe Suku tenke enkontru ho ema na'in-15 hanesan ne'e katak sira prontu ona, depois fó hatene ami fó formasaun ba sira semana ida hafoin ita konvida SEKoop mai formaliza tiha sira”, esplika nia.

Bainhira formaliza, hafoin halo lista ba formandu sira no haruka ba SEKoop atu nune'e rekomenda fali estatutu ne'e ba rezistu iha notariadu, hafoin bele fó pedidu ba SEKoop kona-ba saida mak presiza. (*)