Ministru Prezidensia Konsellu Ministru, Fidelis Leite Magalhães esplika, diploma ne’e hakarak atu adekua remunerasaun Prezidente Autoridade Munisipál ni Administradór Munisipál sira ho responsabilidade ne’ebé boot katak dezempeñu kargu nian implika, hanesan reprezentante sira, ba nível munisipál, husi Governu Sentrál, ne’ebé kaer responsabilidade sira ba servisu oioin sira ne’ebé fó husi Governu ba sidadun lokál sira.
“Ho projetu Dekretu Governu ne’e, hahú husi fulan-janeiru tinan 2022, Prezidente Autoridade Munisipál sira sei simu remunerasaun fulan-fulan dolar amerikanu 1.600 no Administradór Munisipál sira sei simu dolar amerikanu 1.300”, informa Fidelis agalhães hafoin reuniaun Konsellu Ministru, iha Palásiu Governu, kuartu (04/08).
Tanba, KM iha loron 04 fulan-Agustu aprova ona projetu Dekretu Governu, ne’ebé aprezenta husi Ministru Administrasaun Estatal, Miguel Pereira de Carvalho, kona-ba alterasaun dahuluk ba Dekretu Governu ne’ebé refere ba remunerasaun husi Prezidente Autoridade Munisipál no Administradór Munisipál sira. (*)