“Objetivu enkontru ohin (02/08) oinsá mak estabelesimentu kooperativa feto ba nível nasionál ninian, tanba iha organizasaun internasionál sira balu ne'ebé mak husu para ita-nia reprezentante feto balu ne'ebé mak aban-bainrua hola parte iha organizasaun internasionál sira”, dehan Diretór Jerál Kooperativas, Francisco Xavier, iha Akait, segunda (02/08).

Atu atinje meta ida ne'e, SEKoop halo hela preparasaun konvida dirijente kooperativa feto sira ne’ebé iha ona kapasidade hodi bele estabelese fali estrutura kooperativa feto nian iha nível nasionál, nune'e iha futuru bele reprezenta TL hodi kompete ho kooperativa feto sira iha nível internasionál.

“Bele reprezenta nasaun ida nian ba organizasaun internasionál sira, ne'e importante la halimar, tanba ida ne'e mak ohin halibur malu iha ne'e, liliu sira ne'ebé mak mai husi munisípiu, husi kooperativas ida-idak. Sira ne'ebé mak mai, reprezenta husi estrutura kooperativa ida-idak ninian”, hatete nia.

Tanba ne'e, dirijente kooperativa feto sira ne'ebé partisipa iha sorumutuk ne’e, bele hamosu hanoin foun ho rezultadu ne'ebé di'ak, hodi bele hari’i Koopetiva Feto Nasionál.

"Ha'u fiar katak, sira ne'ebé mak mai iha ona kapasidade, iha ona koñesimentu di'ak ba área kooperativa ninian”, dehan nia. 

Reprezenta Dirijente Feto husi Kooperativa Lakon Nakukun, Mosu Naroman (Lanamona), Filomena dos Santos hatete, razaun presiza kria tan kooperativa nível nasionál ba de'it feto, tanba iha mós parseiru internasionál ne'ebé makahakarak fó sira-nia apoiu kona-ba formasaun hodi eleva koñesimentu kona-ba kooperativa, no hakarak fó empoderamentu ba feto sira.

"Ne'ebé objetivu ohin ne'e, ami seidauk tama iha ne'ebá, maibé koko atu forma took kooperativa ne'ebé mak ba feto de'it, e kooperativa ida ne'e bele dehan katak ba nível nasionál, e sei bele haree mós kooperativa sira seluk ne'ebé mak atu sai kooperativa ezemplar ida, sé ha'u la sala hanesan ne'e”, dehan nia.

Kooperativa feto ne'e rasik, nia orientasaun hanesan mós ho kooperativa sira seluk, sé kréditu, entaun rai no foti osan, apoiu ba halo atividade ekonómika no atividade sira seluk ne'ebé nia benefísiu ba duni membru sira.

"Ohin mak foin atu hari’i, ami haree took ekipa tékniku halo aprentasaun ne'e oinsá, ami halo diskusaun depois sé hothotu komprende ona, forma estrutura, depois prosesu tuir mai sei halo rejístrasaun hanesan ho kooperativa sira seluk, só úniku ne'e mak kooperativa ne'e feto de'it”, afirma nia.

Dirijente kooperativa feto sira ne'ebé SEKoop konvida hodi partisipa iha reuniaun hanesan, Crédito Uniăo Builale iha Postu Administrativu Ossú, Lakon Nakukun Mosu Naroman (Lanamona), iha Munisípiu Maliana, no Hisik Kosar Ba Moris (Hikmor) iha Aileu, inklui kooperativa seluk tan ne'ebé maioria feto. (*)