"Ami hamutuk na'in-22 mak hari'i grupu ne'e iha loron 18 fulan-Abril liuba,  atu foku ba servisu agrikultura ninian ne'ebé ho karáter multisetórial. Katak ami sei kuda modo, halo kolam hakiak ikan, inklui halo pembibitan ba ai-oan sira, nune'e bele kuda iha tempu udan monu rai mai agora”, hatete Koordenadór Grupu SEFOSALA, Justino Mariano de Carvalho, iha toos Bilou, domingu (18/07).

Tanba, dadaun fila hela rai no sei hahú uluk ho atividade kuda modo hafoin kontinua kedas ho servisu sira seluk.

Grupu ne'e hari'i atu halibur joven sira oinsá bele servisu hamutuk iha toos hodi hamosu rasik empregu, nune'e labele dependénsia bebeik ba ema seluk (inan-aman).

Tuir planu, grupu ne'e sei transforma hanesan sentru ida ba grupu ortikultura sira hothotu iha Postu Administrativu Laklo, tanba sei kria formasaun ba membru sira hodi hasa'e kuñesimentu iha área agrikultura.

Membru grupu SEFOSALA, Octavio dos Santos Soares hatete, durante ne'e joven barak mak halibur de'it no laiha servisu, nune’e grupu bele hafanun liután foinsa'e sira atu fó konsentrasaun ona ba atividade agrikultura, tanba sai hanesan setór produtivu ne'ebé bele fó sustentánbilidade ba dezenvolvimentu nasaun.

"Ha'u hanoin, tempu ona atu ita hola parte iha servisu sira hanesan ne'e, para bele produz dadauk ona poténsia sira ne'ebé mak ita iha. Tanba dala-barak ema dehan soberanu ai-hán ne'e, katak ita tenke kuda buat ne'ebé ita-nia, no hán ai-hán nee'bé mak ita rasik mak produz. La'ós ema seluk mak produz, maibé ita na'in rasik mak prodúz. Ho ida ne'e, ba oin ami servisu maka'as liután, hodi atinje mehi saida mak ami planeia ona”, afirma nia.

Entretantu, grupu Multisetórial SEFOSAL, hari’i husi joven Suku Uma-naruk, Lakumesak, Uma-duak, Hohorai no Laikore, iha Postu Administrativu Laklo, Munisípiu Manatutu. (*)