“Sira sei hela permanentemente iha nível postu atu eduka populasaun sira, eduka joven sira, no forma mós joven sira e sensibiliza populasaun en-jerál atu nune'e ema hothotu bele hola parte iha vida kooperativa hodi kontribui ba redusaun kiak no kriasaun kampu de traballu atubele reduz mós dezempregu ne'ebé iha ita-nia rain”, dehan Elizário ba jornalista sira iha Salaun Săo José, Igreja Katedrál, Bebora-Dili, kinta (15/07).
Formasaun ne’ebé ba joventude sira durante fulan ida, hahú iha loron 15 fulan-Juñu to'o 15 fulan-Jullu tinan 2021 ne'e, ensera iha husi SEKoop rasik.
Joventude hamutuk na'in-199 ne'e, sei estabelese kooperativa ba sira-nia an rasik (autu empregu) iha nível postu hodi asegura partisipasaun sidadaun no joven sira-nian.
“SEKoop sei hamri'ik iha sira-nia oin, atu dada sira, bainhira sira atu monu. Dudu husi kotuk bainhira sira la forsa, atu nune'e sira bele hamri'ik metin atu ba oin labele dependente demais ba instituisaun estadu nian ka instituisaun husi rai seluk nian”, dehan nia.
Tanba Timor-Leste nia ukun-an atu liberta husi joven sira, nune'e governu liuhusi SEKoop sempre iha esperansa katak joven sira mak tenke iha papél importante atu hadi'a rai ne'e.
“Mensajen badak de'it katak, ba joven sira mak tenke hahú ohin ba sira sente katak, rai ne'e sira-nian”, afirma nia.
Reprezentante Formandu, Gonzalo da Costa Gonçalves hatete, durante formasaun fulan ida, hetan matéria lubuk ida husi formadór sira, hodi bele prepara sira-nia an sai fali hanesan formadór, mobilizadór no organizadór iha baze.
“Depois durante formasaun, ami konsege tuir formasaun, hili dirijente ba kooperativa liuhusi prosesu assembleia jerál mai to'o iha votasaun, depois eleitu ami nu'udár dirijente ba kooperativa ba oin, ho mandatu tinan tolu”, hatete nia.
Matéria ne'ebé formasaun ne'e, relevante ho atividade kooperativa nian, liliu oinsá prosesu atu hari'i kooperativa, kria estatutu.
“Formasaun kona-ba oinsá iha esperiénsia atu lidera organizasaun kooperativa, depois mós formasaun kona-ba kontabilidade, nomós kona-ba prosesu sai dirijente ba kooperativa, no prosesu sai hanesan fiskalizadór iha kooperativa. Husi matéria sira ne'e, durante fulan ida pelu-menus sufisiente para ami bele fila ba baze hodi motiva, organiza, mobiliza ami-nia maluk sira”, afirma nia. (*)