Tempotimor (Dili)-Sekretária Estadu Kooperativa (SEKoop) husu ba ministériu sira atu servisu hamutuk hodi fó apoiu ba grupu produtór sira atubele reforsa ekonomia iha rai laran.

"Rekomendasaun, mak oinsá mak ita esforsu suporta ita-nia grupu sira ne'ebé mak iha área rurál atubele aumenta produsaun ba agrikultura atu nune'e bele reforsa ita-nia ekonómia iha nível nasionál nomós fó kontribuisaun ba ita-nia populasaun ne'ebé mak sei moris iha situasaun susar nia laran”, dehan Diretór Jerál SEKoop, Francisco Xavier, bainhira partisipa iha diálogu nasional ba sistema seguransa ai-hán iha Otél City 8, Kanossa Has-laran, tersa (13/07).

Tanba ne'e, SEKoop nia prezensa iha diálogu refere, oinsá atu hato'o informasaun ruma iha relasaun ho servisu SEKoop nian ba apoiu programa sistema seguransa ai-hán iha Timor-Leste (TL) liuhusi kooperativa nian nune’e bele integra-an iha programa sira husi Organizasaun Nasaun Unidas (ONU) nian.

"Tanba ida ne'e mak, oras ida iha diskusaun nia laran, ita fó kontribuisaun liliu servisu ne'ebé mak ita halo ona entre SEKoop ho komunidade, e aleinde ida ne'e mós informasaun prioridade sira ne'ebé mak SEKoop produz hela", hatete nia. (*)