Durante tinan 36 ejisténsia, membru sira iha kooperativa ne'e, konsege hari’i ona sira-nia sede rasik hodi halibur membru sira nune'e bele hala'o servisu kada loron. Maske hasoru problema finanseiru iha tinan hirak liuba.
"Mais, so ke ho krize 1999, ami-nia osan ne'e sai paradu hotu, depois ema funsionáriu barak mak empresta, sira hothotu ba tiha Indonézia. Depois mai fali, ha'u hatene katak, buat kooperativa, buat di'ak ida ba komunidade sira ne'ebé kbi'it laek iha fatin ida ne'e, tanba ami iha fatin ida ne'e, ema empresta ba malu, setarus ($100), atu fulan 2 ou 3 fó mós, nia tenke fó dua ratus ($200). Tanba ida ne'e ha'u triste la halimar. Depois iha momentu ne'ebá, osan ne'e ha'u tau filafali hodi loke kooperativa ida ne'e”, haktuir Prezidente Kooperativa CU-Aituturina, Jeferino Andrade, iha sede kooperativa, sábadu (10/07).
Hafoin iha tempu independénsia, governu liuhusi Ministériu Turzímu Komérsiu no Industria (MTKI), lori osan ho valór rihun US$10 fó Prezidente Kooperativa hodi entrega ba membru CPD-RDTL sira iha área Mulo nian.
"Iha momentu ne'ebá, mai sira tau osan ne'e hamutuk US$10 mill ba ha'u, kuaze ha'u hasoru sira CPD-RDTL ne'e dala-haat, sira lakohi, ha'u lori de'it fós mós sira lakohi, fó osan mós sira lakohi. Sira dehan buat ne'ebé governu nian ami la simu. Depois iha momentu ne'ebá, ministru (MTKI) hakarak mai foti fali osan, ha'u la fó ona. Ha'u dehan ita-boot sira prioridade ba sira CPD-RDTL, maibé komunidade sira ne'e halo nusá. Sé kuandu osan ne'e di'ak liu ami loke fali ami-nia kooperativa. Ho ida ne'e mak ami loke fali kooperativa to'o agora”, hatete nia.
Tanba ne’e, osan hamutuk rihun US$10 ne'e, komesa hamoris fali kooperativa ne'e to'o ohin loron.
Kritériu atu sai membru ba kooperativa CU-Aituturina, kada ema hatama US$50 no kada fulan hatama US$5.
Enkuantu, sira atinje ona kapitál finanseira hamutuk rihun US$57 ho totál membru hamutuk ema 95. (*)