Deklarasaun ne’ebé fó sai husi SEKoop Elizário, bainhira partisipa iha Asembleia jerál CU-RADIFU nian ba dalima ne'ebé realiza iha salaun sorumutuk Postu Administrativu Ainaru Villa, Munisípiu Ainaru.

“Prezensa sekretáriu estadu ninian ne'e atu motiva dirijente sira, kooperante sira atu nune'e sira bele motivadu liután atubele organiza, mobiliza ema atu aumenta barak tan iha kooperativa e atu nune'e bele aumenta sira-nia kapitál kooperativa nian”, dehan, Elizário Ferreira, iha Ainaro, sesta (09/07).

Iha vida kooperativa, asembleia jerál hanesan mós instrumentu ida aas liu hodi halo avaliasaun ba dezempeñu servisu husi estrutura no membru sira ne'ebé hala'o ona durante tinan ida nian.

“Prezensa iha ne'e atu reforsa liután sira, e hanesan aktu rekuñesimentu ida ba sira-nia atividade kooperativa nian durante tinan ida. Tanba hanesan kooperativista ida atu motiva sira kona-ba frakeza no dezafiu ne'ebé sira enfrenta inklui projeta saida mak sira bele atinje iha futuru”, afirma nia.

Tanba opulasaun iha Munisípiu Ainaru, kuaze rihun-60-resin, maibé partisipasaun komunidade nian iha kooperativa sira sei mínimu.

Ho ida ne’e, ba futuru joven sira sei hola parte iha kooperativa RADIFU, atu akompaña no mobiliza populasaun sira liuhusi fahe informasaun hodi ema hotu bele envolve-an iha kooperativa ho kuantidade boot.

“Sé ita kompara populasaun Ainaru ne'ebé iha 66 mill, mais agora membru kooperativa seidauk atinje mill, ne'e parte ida dezafiu, maibé oportunidade oinsá mak ema kooperativa sira bele servisu atinje membru ne'ebé mak barak, tanba kooperativa ne'e ema dehan “base member” katak membru sira mak sai baze ba dezenvolvimentu kooperativa nian”, hatete nia. 

Nune’e mós Prezidente CU-RADIFU, Américo Lopes hatete, sira-nia parte komprome sei hadi’a rekomendasaun ne'ebé hato'o husi SEKoop hodi bele dezenvolve kooperativa la’o ba oin.

“Ho rekomendasaun husi SEKoop, ida ne'e mak ami esforsu hela, rekomendasaun ne'ebé mak ohin sekretáriu estadu fó ne'e ami esforsu hadi'a fali fallansu ne'ebé mal iha atubele mellora di'ak liután iha ami-nia CU-RADIFU nian”, promete nia.

Entretantu, iha asembleia jerál ba CU RADIFU ba dalima ne'e, estrutura sira aprezenta programa no planu ba kurtu prazu, médiu prazu, no longu prazu, inklui aprezenta mós exelente (di'ak liu) ne'ebé durante tinan 2018 to'o 2020 nian ba membru sira. (*)