“Ha'u hanoin, ba formasaun ne'ebé mak ohin husi sekretáriu estadu kooperativa, ami sente formasaun ne'ebé di'ak teb-tebes, tanba ita haree durante ne'e iha grupu kooperativa ba agrikultór sira mais laiha ema balu que atu mai motiva, no laiha parte relevante ruma mai atu arruma grupu sira ne'e oinsá mak atu dezenvolve didi'ak iha área agrikultura”, dehan Koordenadór Assosiasaun Komunidade Dezenvolvimentu (ASKODE), Hipólito Alves dos Santos, iha Ainaru, kinta (08/07).

Tanba formasaun ne'e, bele motiva komunidade sira oinsá atu dezenvolve di'ak liután setór kooperativa liliu produsaun produtu lokál kooperativa nian atu nune'e ba futuru bele iha esperansa katak labele halo importasaun bebeik ba produtu husi estranjeiru.

“Ami sente kontente teb-tebes ho formasaun ida ne'e, ho fiar katak iha futuru ita bele dezenvolve liután ita-nia setór kooperativa, liliu iha área agrikultora nian”, afirma nia.

Iha fatin hanesan partisipante Formasaun, Paulito Oliveira Magno, konsidera treinamentu ne'e importante tanba foin ba dahuluk hala’o iha munisípiu Ainaro.

Maibé sujere ba SEKoop atu promove formasaun ne’ebé hanesan ba komunidade sira iha área remota, tanba produtu barak liu prodúz iha nível aldeia ho suku sira.

“Treinamentu ida ne’e faze ida dahuluk durante loron tolu. Maibé ha'u sujere ba sua-exelénsia, labele para de'it iha munisípiu, tanba rendimentu ne'e barak liu mai husi Suku ho Postu sira. Entaun, dala-barak populasaun sira iha área remotas ne'ebá ne'e sira ladun iha kuñesimentu oinsá atu bele kria kooperativa, oinsá atubele estabelese sira-nia talentu sira ne'ebé mak iha área rurál ne'ebá”, sujere nia.

Entretantu, programa importante iha SEKoop mak, atubele dezenvolve di'ak liután kooperativa sira iha baze, tenke hahú, dezenvolve no kontrola ho edukasaun hodi hametin sustentábilidade. (*)