“Ba loron kooperativa mundiál ninian ne'ebé mak sei monu iha dia 03 semana ida ne'e, e ha'u hanoin loron ida ne'e importante ba ema kooperativa sira, no loron ida ne'e deside husi Asean Confederation Credit Union (ACCU), nu'udár organizasaun internasional ida ba mundu tomak, atubele reflete fali loron ida ne'e, nune'e saida mak ita bele mellora, saida mak ita bele hadi'a para depois ba oin ne'e, bele fó vantajen ba kooperativa sira hodi hadi'a no mellora sira-nia atividade”, dehan Diretór Jerál iha SEKoop, Francisco Xavier, ba www.tempotimor.com iha kna'ar-fatin Akait, kuarta (30/06).
Atividade ne'ebé SEKoop sei hala'o hodi komemora loron mundiál, sei iha palestra husi Ministru Koordenadór ba Asuntu Ekonómiku (MKAE), Joaquim Amaral, ho Sekretáriu Estadu Kooperativa (SEKoop), Elizário Ferreira, ne’ebé partilla informasaun balu kona-ba asuntu ekonómia no kooperativa iha rai laran nomós liur.
“Atu nune'e, ita hothotu bele hetan informasaun no akompaña progresu ne'ebé halo husi nasaun sira seluk hala'o para depois sai hanesan referénsia ida ba Timor-Leste para hadi'a di'ak liután ita-nia kooperativa di'ak liután ba oin atu nune'e bele hadi'a mós ita-nia ekonómia iha rai laran”, hatete nia.
Aleinde ne'e, sei fahe mós esperiénsia kooperativa balu ne'ebé reprezenta husi movimentu kooperativa sira hodi aprezenta kona-ba progresu ho dezafiu saida mak hasoru iha sira-nia atividade kooperativa nian.
Komemorasaun loron mundiál kooperativa ne'e, Timor-Leste foin partisipa iha tinan 2007 to'o ohin loron, maibé internasionalmente, membru kooperativa sira iha nasaun seluk sempre selebra kada tinan.
Tuir ajenda ne'ebé iha komemorasaun ne'e sei hala'o ho tema "Reconstruir Melhores Juntos", no sei rona mós mensajen husi Diretór Jerál ba Aliança Cooperativa Internacional (ACI), nian ne'ebé sei halo leitura husi Sekretáriu Estadu Elizário Ferreira, iha Salaun Rudal, Osindo Dili.
Enkuantu, partisipa sira mai husi funsionáriu sira iha SEKoop, reprezentante husi movimentu kooperativa sira, inklui joventude hamutuk na'in-atusrua ne'ebé oras ne'e tuir hela formasaun husi formadór sira SEKoop nian. (*)