"Sim, iha fulan hirak mai ne'e, sempre aumenta, katak sa'e ona ba 800 kada fulan ida, e aumenta mós kompaña balu ne'ebé mak foti husi ita. Kios ne'ebé ha'u aprezenta, uluk sei 15, agora ne'e aumenta ona 20 ba leten”, informa Koordenadór Grupu Kooperativa Nurak Sulin Hamutuk, Luciano dos Santos Pereira ba www.tempotimor.com, iha Suku Vatuvou, sábadu (26/06).

Produsaun ba bee Aqua Galon hirak ne'e, distribui fali ba kioske na'in sira hodi fa'an tutan fali ba populasaun sira iha Aldeia Raime, Suku Vatuvou, Postu administrativu Maubara, Munisípiu Likisá.

"Kioske na'in sira ne'e fa’an tutan Aqua Galon ne'ebé mak ami prodúz, uluk ami fó galon 10 ba leten de'it, agora ne'e to'o ona 50 galon”, dehan nia.

Grupu ne'e hari'i iha tinan 2017, sira komesa de'it atividade halo peskiza oinsá mak produz tasi-been sai, no hafoin halo peskiza, rezultadu hatudu pozitivu no halo kedas ho lansamentu no promosaun.

“Tinan 2019 ami halo lansamentu ba ita nia produtu tasi been ba bee mós, iha tinan ne'e duni, ami halo distribuisaun kedas ba komunidade ou kioske sira, no iha 2020 nia laran, ami halo promosaun ida maka'as liután, e iha 2021, konsege ami atinje metas ne'ebé mak ami target ona”, dehan  nia.

Durante simu vizita husi SEKoop, sira aprezenta mós atualiza informasaun kona-ba atividade grupu ne'e nian ba iha SEKoop, hodi hatene sira-niq progresu atividade.

Sekretáriu Estadu Kooperativa (SEKoop), Elizário Ferreira, husu ba sira atu kada fulan tenke atualiza informasaun ba sira hodi hatene, no husu atu aprezenta relatóriu ne'ebé detalla ho formalmente.

Totál membru permanente iha kooperativa ne'e, hamutuk ema na'in-16, no akomoda ona sira kapitál hamutuk  U$.1165.50 dollár Amerikanu, ne'ebé oras ne'e sira asegura ona iha banku. (*)