“Iha ne'e ha'u reprezenta ha'u-nia kolega feto sira, hakarak hato'o netik liafuan ida-rua ba na'i sekretáriu estadu, atubele hanoin netik ami, tanba durante ne'e ami feto barak mak halerik, tanba servisu laiha, e ami mós hakarak atu fila liman atu halo buat ruma, maibé ami-nia forsa mak la to'o”, dehan Koordenadóra Grupu Feto Kreativu, Ana Paulina Miranda Freitas, iha Aldeia 30 de Agosto, Suku Komoro, sesta (25/06).
Grupu ho membru ema 20 hanoin atu halo negósiu, maibé laiha possibilidade atu sosa mákina. Tanba ne’e husu atu oinsá SEKoop bele apoiu.
“Ami hato'o ba katak ami iha grupu ki'ik-oan ida, e ami hakarak mákina suku roupa nian ho mákina obras, ho buat seluk tan”, afirma nia.
Aliende n’e husu atu SEKoop aprova sira nia pedidu ne’ebé hato’o no halo vizitza ba sira-nia fatin hodi observa direta atividade ne’ebe la’o durante ne’e.
“Ami forma tiha ona grupu ida, maibé ami laiha posibilidade atu hola sasan sira ne'e mak laiha. Tanba ne'e, komu nai sekretáriu estadu mai ona iha ami nia leet, entaun ami diretamente hato'o de'it ba sua exelénsia atu bele rona ami hanoin ida ne'e”, hatete nia.
Hatán ba preukupasaun ne’e, Sekretáriu Estadu Kooperativa (SEKoop), Elizário Ferreira hatete SEKoop nia odamatan nakloke ba sidadaun se de’it, bainhira iha vontade atu hari’i atividade kooperativa iha sira-nia aldeia ho suku, hodi dezenvolve ekonómia familiar, maibé husu mós atu aprezenta pedidu formál.
“Feto sira aprezenta sira aprezenta grupus de atividade, ami hatete katak, parte sekretáriu estadu ne'e nakloke ba fasilitasaun sira hanesan formasaun, ekipamentus atubele asegura oinsá mak grupu sira bele dezenvolve, naran katak lori bandeira kooperativa nian, afirma nia. (*)