“Ita finál ona. Iha problema oituan iha suku Kassa, maibé enkontru tékniku la'o ona, para finaliza iha Kassa ne'e, tanba foin lalais iha intervensaun oituan, e komunidade mós la aseita atu simu sesta bázika ne'e”, deklara Diretór Jerál Kooperativa, Francisco Xavier iha kna'ar-fatin Akait, kinta (24/06).

Populasaun ne’ebé pertense ba responsabilidade SEKoop nia mai husi munisípiu 7 hanesan, Covalima, Ainaru, Aileu, Manufahi, Likisá, Manatutu ho Lautein.

Iha implementasaun programa ne'e, parte SEKoop hamutuk ho kompaña ne'ebé resopnsável, hahú lansa uluk sira-nia distribuisaun ai-hán ba populasaun sira iha Suku Tazilin, Postu Administrativu Zumalai, Munisípiu Covalima, iha fulan-juñu tinan 2020.

Maibé, iha loron tersa loron 15 fulan-juñu tinan 2021, SEKoop termina ona nia atividade distribuisaun ai-hán iha munisípiu 6, no sei hela de'it aldeia ida iha munisípiu Ainaru mak seidauk termina.

“Fin lalais ita-nia tékniku sira halo enkontru ona ho autoridade lokál, e sei informa ba komunidade, sira karik prontu simu, entaun semana ida ne'e bele kompleta ona ba sein-pursentu (100%)”,  esplika nia.

Razaun komunidade seidauk simu tanba autoridade lokál ho komunidade sira la informa ba malu kona-ba objetivu no benefísiu husi simu programa sesta bázika, ho nune'e mak mosu diferensa opiniaun.

“Ami hanoin tuir mai, karik sira rona ona informasaun husi parte hothotu, entaun sira mós agora konkorda ona atu simu ai-hán sesta bázika”, dehan nia. (*)