"Ha'u kuandu rona Pelican Paradise ne'e, ha'u sei jeneral. To'o ha'u prezidente sai tan tiha, agora Primeiru Ministru mós atu besik sai ona. Maibé, kompañia ne'e seidauk halo buat ida," dehan Primeiru ministru Taur Matan Ruak iha Palásiu Prezidensial Bairru-pite, Kinta (18/07/2019).
Tuir eis jeneral F-FDTL fitun rua ne'e, parte governu husu ona ba empreza Pelican Paradise kona-ba investimentu ne'e. Maibé, laiha asaun ruma husi empreza kona-ba investimentu iha Tasi Tolu.
"Ha'u mós uluk husu ba nia, bainhira mak o halo, bainhira mak o deziste. Ha'u uluk husu ba emprezáriu ne'e katak bainhira mak ita boot deziste halo projeitu iha Timor Leste,” PM tenik.
Nia mós dehan, bainhira parte Pelican Paradise laiha vontade hodi hahú asaun ba investimentu refere, bele difikulta atu hetan aprovasaun iha Konsellu Ministru kona-ba projeitu investimentu espesial nian, hanesan governu TL halo ona ba TL Cement no Heineken.
Iha Parte seluk kompania ne'e sei pasiencia hein atu hetan akordu investimentu especial husi Governu hodi hahu implementa konstrusaun ba hotel iha area balun Tasi Tolu. Governu Timor Leste halo ona akordu investimentu especial ho kompania bo'ot rua hodi nune'e komapnia sira hahu hala'o sira nia atividades.