Tanba problema covid-19, rezulta governu Timor-Leste (TL) hanaruk situasaun Estadu Emerjénsia hodi hapara atividade hothotu, ikus mai emprezáriu sira la hetan lukru, nomós laiha kapitál hodi selu fali ba traballadór ne'ebé sira emprega.

“Tinan ida ne'e (2021), taka totalmente hamutuk 22, sira mai hatete, sira laiha ona lukru, tanba empréza sira hakarak buka lukru, ne'e laiha ona. Lukru laiha tiha ona, sá tan ninia kapitál, ami kapitál mós laiha ona”, dehan Diretór Servisu ba Rejístu no Verifikasaun Emprezárial , institutu públiku (SERVE, IP), Florénçio Sanches iha kna'ar-fatin, Hudi-laran, kinta (17/06).

Empréza ne’ebé taka husi nasionál ho pursentu 80 (80%), no internasionál ho pursentu 20 (20%), ne'ebé hato'o pedidu ba SERVE atu hapara atividade tanba laiha ona kapitál. 

Maske iha tinan 2020, iha empréza hamutuk atus-ida (100) husu ba SERVE atu autoriza hapara ona-sira nia atividade, maibé ba tinan 2021 ne'e, menus liu, tanba emprezáriu sira balu hahú komprende ona oinsá diferensa ho efeitu sira entre taka empréza no altera atividade.

Tanba ne'e, husu ba emprezáriu timoroan sira atu labele lakon esperansa atividade hodi taka fali kompaña, maibé atu hapara de'it sira-nia atividade, hodi nune'e bainhira situasaun normaliza, bele reativa fali atividade negósiu.

“Maibé, dala-ida tan husu ba timoroan labele para. Tanba sira ne'ebé internasionál taka, hamaus sira mós labele, purke dehan ami laiha ona orsamentu atu selu uma, selu rai, selu eletrisidade, selu staff, prontu taka. Sira ne'e ita kumpri, maibé, timoroan favor ida, labele taka kompaña, maibé, pauza de'it atividade, purke taka kompaña hanesan ita oho ema. Ida ne'e mate, mate ona, labele moris filafali”, afirma nia.

Tuir dadus, dadaun ne'e, empréza hamutuk rihun-30 (30 mill) mak SERVE rejístadu hodi funsiona sira-nia atividade negósiu. (*)