Tuir Magnífiku Reitór UNTL, Francisco Miguel Martins UNTL halo akordu ho BNCTL kona-ba pagamentus propinas estudante nian.

"UNTL halo akordu ida ho BNCTL atu nune'e, bele kolabora hamutuk kona-ba implementasaun pagamentu propinas estudante nian ne'ebé UNTL hala'o," hatete Martins iha salaun konferensia UNTL, Tersa (16/07/2019).

Akordu ne’e, tuir Martins atu halo modernizasaun ba pagamentu propinas estudante UNTL nian. “Ho ida ne’e, funsionáriu UNTL nia matan mak haree osan. Maibé, liman labele kaer osan. Tanba, akordu ida ne'e ita atu halo modernizasaun ba pagamentu propinas estudante UNTL. Atu nune'e, bele garante transparansia ba akuntabilidade iha prosesu pagamentu propinas estudante nian," dehan reitór ne’e. 

Entretantu, Diretór Jerál Konsellu Administrasaun BNCTL, Sergio Maria Espirito Santo hatete, tinan rua ona UNTL husu BNCTL atu estabelese unidade ida iha UNTL. Nune'e, konsege asina ona MoU. 

"Iha tinan rua ba kotuk, UNTL husu ba BNCTL para atu estabelese unidade ida iha ne'e, hodi halo atendimentu ba estudante sira iha UNTL nomós ba públiku. Nune'e, ami asina ona  Memorandum of Understanding rua, kona-ba prestasaun servisu ne'ebé BNCTL halo nomós ida seluk kona-ba aluga fatin ne'ebé mak BNCTL uza hodi halo servisu," dehan Sergio. 

BNCTL mós husu UNTL ba futuru presiza iha regra balun ne'ebé bele hafasil estudante sira hodi halo pagamentu ba kada semester. Tanba, tuir Sergio volume estudante bo’ot no ikus mai tenke dudu malu hodi halo pagamentu iha BNCTL.

"Ami sei halo diskusaun ho UNTL. Tanba, dadus ne'ebé UNTL fó ba ami ne'e iha 25.000 estudante ativu. Entaun ne'e defisil ba banku atu atende estudante sira ne'e iha semana ida nia laran. Tanba ne'e, manejamentu UNTL ho BNCTL sei tuur hamutuk para ba futuru hanoin took para bele atende estudante sira ka fakuldade, bazeia ba númeru estudante iha fakuldade ida nian," Sergio dehan tan.  

Hatan kona-ba prosesu atendementu iha BNCTL, Sergio esplika, funsionáriu BNCTL kada loron, ema ida bele atende estudante to'o 500 pesoas. Entaun BNCTL sei ko'alia ho UNTL para loron ida, bele atende de'it estudante 2.000 to'o 3.000. Hodi nune'e, estudante sira labele dudu malu iha prosesu pagamentu nian. 

Sergio espera, iha futuru BNCTL garante estudantes UNTL bele halo rejistu foun iha munisipiu, tanba uza sistema BNCTL online.