“Ohin loron ne'e, 70 ital, ba populasaun ka maluk sira ne'ebé presiza, e ita-nia konseptu ida ne'e, prepara duni ba ema ne'ebé mak presiza duni ai-hán”, dehan Inspetór Polísia, Anita Quadros durante oferese ai-hán ba komunidade sira iha Kaikoli, sesta (28/05).
Maske ajudu ne'e naton de'it, maibé importante mak fó ba komunidade sira ne'ebé presiza hodi uza ba konsumu loron ida nian.
Aliende ne’e, Funsionáriu husi Embaixada Filipina iha TL, Rogília Esperança dos Reis esplika, eventu ne'e realiza tanba servisu hamutuk ho governu Filipina liuhusi nia embaixada iha Timor-Leste, ho programa "Community Pantry".
“Iha ne'e ami foti asaun karidade ho naran ‘Community Pantry’. Ami hala'o konseptu ida ne'e ho objetivu hakarak atu tulun maluk sira ne'ebé mak presiza duni hahán iha situasaun serka sanitária ida ne'e”, dehan nia.
Nomós hakarak atu bolu maluk balun mak hakarak atu ajuda, sira bele halo doasaun iha atividade refre.
Atividade refere, embaixada Filipina hala'o ba dala-rua ona iha PNTL munisípiu Dili no komunidade sira kuaze atus-rus- resin ona benefísiu ba apoiu hirak ne’e.
“Ami-nia konseptu ou tema mak hanaran, fó buat ne'ebé o bele fó, foti buat ne'ebé mak o presiza. Nune'e, ita bele fó buat ne'ebé mak ita iha saida de'it, tantu modo tahan, supermie, sé komunidade sira ne'ebé mak balu atu mai foti, sira bele foti hahán ne'ebé mak sira presiza ba loron ida nian”, dehan nia
Nune'e, ema seluk ne'ebé mak presiza, sira mós bele hetan, tanba hahán sira ne'ebé oferese, mai husi doasaun husi timoroan sira balu, iha mós suporta husi komunidade Filipina sira ne'ebé hela iha Timor-Leste.
Entretantu, tipu husi pakote ai-hán sira ne'ebé oferese ba komunidade sira, barak liu nesesidade báziku hanesan, modo-tahan, hahán lokál balu, fós, supermie ho manu-tolun, tanba iha benefísiu di'ak ba ema nia saúde. (*)