“Ami halo akordu kontratu ne'ebé mak governu ho RTTL,EP halo, hodi halo transferénsia osan ba sira ho montante iha kontratu laran millaun US$1,970, ne'ebé mak ami sei fahe ba fatin rua, sei haruka uluk 50% ba e depois 50% tuir tan ba bainhira sira-nia relatóriu tama fali mai”, dehan Ministru Francisco Martins Jerónimo iha Gabinete MAPKomS, segunda (24/05).
Osan ne'ebé governu tranfer ne'e atu ajuda RTTL, no governu mos sei hamriik nafatin iha sira-nia sorin atu garantia buat hotu ba sira, nune'e RTTL bele hala'o kna’ar ho di'ak no funsiona liután.
Tanba susar ne'ebé RTTL hasoru hanesan mós parte governu mak hasoru, tanba buat hotu ne'ebé mak RTTL halo hola parte ba governu.
"Governu iha ninia komitmentu nafatin, prepara kondisaun hotu e ha'u fiar iha ne'e ba oin sira sei servisu di'ak liután, nune'e mós haree sira-nia situasaun iha ne'ebá, liliu iha cobby house ida ne'ebé presiza atu haree lalais, nune'e sira bele halo servisu ho di'ak, bele fo garantia notísia di'ak ba ita-nia komunidade sira hotu”, afirma nia.
Iha fatin hanesan prezidente RTTL,EP, José António Belo, agradese ba MAPKomS ne'ebé ho vontade fo apoiu tomak husi governu hodi selebra akordu atu bele tulun atividade iha RTTL.
Transferénsia Orsamnetu ba RTTL,EP sei fahe ba faze rua, primeiru no segundu.
"Verba suvensaun públika ida ne'e tranfer iha parte rua, 50% ho kontratu ne'ebé Asina ohin, depois depende ba iha ezekusaun ne'ebé parte husi RTTL ninia, eh pelumenus to'o Setembru, ami tenke hatama relatoriu trimestral para bele konklui tan tranfer segunda vez nia", Dehan prezidente RTTL.Ep
RTTL,EP nu'udar estasaun estatal ida, la hanesan ho kompaña privadu no nia ho natureza ida ne'ebe presiza tau konsiderasaun mak, kualker saida de'it ne'ebe RTTL halo ne'e baze de estadu ninia, nune'e to’o momentu ne'ebé de'it RTTL sempre koopera ho estadu hodi bele lori informasaun kualidade no fatual ba povu. (*)