“Akordu objetivu dezenvolvimentu ne’e oferese kontribuisaun dahuluk millaun US$17.9 husi orsamentu totál millaun US$92.3 nu'udár parte husi United States Agency for International Development (USAID) nia estratéjia kooperasaun dezenvolvimentu paiz ba tinan lima dura to’o fulan-dezembru 2025”, hatete Embaixadór Kevin Blackstone iha salaun Ministériu Finansa (MF), Ai-tarak laran, tersa (18/05).
Akordu kooperasaun ida ne'e, asina liuhusi USAID, ho Ministériu Finansa (MF) hodi hametin setór ekonómia la'ós petrolífera no reforsa governasaun di’ak iha TL.
Ministru Prezidénsia Konsellu Ministru (MPKM), Fidélis Leite Magalhăes esplika, kooperasaun ida ne'e, ko’alia iha setór oioin, maibé foku liuba setór rua mak hanesan diversifikasaun ekonómia no dezenvolvimentu institusional, boa governasaun.
“Importánsia husi akordu ba Timor-Leste saida. Primeiru, ne'e hanesan rekoñesimentu ida ba Timor-Leste ninian lala'ok dezenvolvimentu durante ne'e. Segundu, apoiu hirak ne'e sei transforma mós ba ita-nia dezenvolvimentu instituisaun, setór turizmu, setór agrikultura, saúde, ne'ebé ne'e atualmente vantájen ba Timor-Leste”, esplika Fidélis Leite iha Ai-tarak Laran.(*)