Formasaun ida ne'e halao liuhusi vídeo konferénsia ho nia tema "Kreatividade Lideransa Kooperativa Iha tempu post Covid-19.

"Sé formasaun ne'e hotu, covid ne'e termina karik, saida mak lideransa sira bele halo atubele asegura dezenvolvimentu kooperativa ne'e. Ha'u kontráriu mós, sé covid ne'e la termina karik, saida mak bele halo atu asegura sustentabilidade no estabilidade kooperativa nian”, dehan SEKoop Elizário Ferreira durante abertura formasaun iha Akait, segunda (17/05).

Formasaun ne'e prioridade liu ba diretór sira, dirijente sira, ho jestór sira  kooperativa sira ne’ebé lokaliza iha Munisípiu Dili laran hodi nune'e sira bele hetan referénsia ne’ebé di'ak.

Ho ida ne’e atubele asegura dezenvolvimentu kooperativa nian ba futuru, nomós iha situasaun ida atuál. Tanba ne'e mak objetivu prinsipál husi formasaun ida ne'e.

Bainhira situasaun normaliza, faze tuir mai mak sei fó estudu komparativu ruma atubele foti referénsia ruma hodi dezenvolve kooperativa ho modelu ida ne'ebé TL aprende ba.

Partisipante sira iha Formasaun ne'e, hamutuk ema na'in-30, kompostu husi SEKoop na’in-15, ho na'in-15 husi jestór kooperativa sira iha kapitál Dili laran.

Tuir planu, formasaun identiku ne'e, SEKoop sei realiza tan formasaun iha loron 31 fulan-maiu tinan 2021, tanba iha kooperasaun di’ak ho governu Tailándia, liuhusi nia embaixada iha TL. (*)