Koordenadór organizasaun PSHT husi Sub-Metinaru, Alfredo Soares Fernandes hatete, apoiu nesesidade báziku hirak ne'e, fó liuhusi organizasaun iha Metinaru hamutuk ho Nahaek, Aileu nian, Block (Raiun F) halibur malu tau hamutuk kontribuisaun oituan, hodi fó netik buat balu ba família afetadu sira.
"Ami hetan duni kontribuisaun husi maluk sira, mak to'o de'it iha ami sosa fós hamutuk saka 42 no supermie hamutuk dos 10 hodi fó tulun ba família sira iha Laklo”, dehan Koordenadór organizasaun PSHT husi Sub-Metinaru ne'e iha Taibessi, kinta (13/05).
Koordenadór Halibur LakloAnan (HAL), António Cárceres de Carvalho, lori vítima sira hato'o agradese ba apoiu husi organizasaun PSHT, tanba iha sentidu solidariedade no umanizmu hodi bele tulun família afetadu sira.
"Ami agradese ba organizasaun PSHT husi sub Metinaru nian ne'ebé mak ohin dadeer marka prezensa iha ne'e, lori apoiu ne'ebé maka mai iha postu Halibur Laklo Anan iha Taibessi, responde ba ami ninia propósta ne'ebé antes ne'e ami hatama, nune'e sei distribui fali ba ami-nia inan-aman sira ne'ebé afetadu husi inundasaun iha Laklo", agradese nia.
Maibé iha loron sábadu (08/05) semana kotuk, halo ona distribuisaun iha faze dahuluk nian ba vítima sira iha Lacló ho kuantidade fós hamutuk atus-tolu, inklui sasan nesesidade bázika seluk tan.
Postu Admimistrativu Lakló, kompostu husi Suku 5, Aldeia 21, no totál familia sira ne'ebé afetadu husi dezastre inundasaun, hamutuk 255 iha Laklo.(*)