Print this page

Vítima Inundasaun 237 iha Golgota seidauk simu apoiu husi Governu

Tempotimor (Dili)-Durante fulan ida ona, hahú iha loron (04/04) to'o oras ne'e, vítima afetadu inundasaun hamutuk 237 iha aldeia Golgota, Suku Komoro, seidauk simu apoiu emerjénsia ruma husi governu.

Xefe aldeia Golgota, Agostinho de Sousa Pereira informa, durante mosu problema inundasaun, vítima sira ne'ebé nia uma ladun hetan estragu, maibé bee sa'e de’it, hamutuk 233, no família uma kain haat mak kondisaun gráve, nune'e totál afetadu ida uma-kain 237.

Nia haktuir, hafoin inundasaun, vítima sira konsege simu apoiu emerjénsia husi individual sira nomós husi Organizasaun Naun Governamentál (ONG) balu, maibé husi governu rasik, to'o oras ne'e seidauk fó apoiu.

"Husi governu seidauk, maibé momentu ne'ebá, ha'u duni mak koolabora ho parte protesaun Sivíl, ho mós sira CVTL, ami tun ona ba survey fatin ne'ebé mak afetadu sira ne'e. Husi ONG balu fó apoiu, ha'u bele hatete katak, ida ne'e ha'u agradese, maibé la sufisiente, husi lideransa partidus politiku balu mós mai fó apoiu ona, mais seidauk máximu”, dehan nia ba www.tempotimor.com liuhusi telefone, domingu (09/05).

Tanba ne'e, buka esforsu hari’i Posku Uminitáriu ida iha sede aldeia Golgota, hodi ko’alia ho nia amigu, parseiru balu atu kontinua apoiu nafatin ai-han.

Dala-ruma populasaun sira sempre husu kona-ba bainhira mak sira bele simu apoiu husi governu, maibé nia labele hatán resposta ruma, tanba presija hein orientasaun husi leten (governu) mak bele fó sai ba populasaun sira.

“Ha'u bele ko’alia, ha'u oras ida ha'u lakohi inventa, purke situasaun ne'e ha'u rasik mak sente, sé loloos ne'e, ha'u-nia populasaun la merese atu mai iha ha'u-nia fatin, mais prontu, hanesan maun ida, aman ida ba sira, sira mos ha'u-nia inan-aman, ha'u tenke rona sira-nia preukupasaun, situasaun saida mak infrenta, ha'u mós presiza hatene", dehan Xefe aldeia Golgota.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items