"Ami agradese ba sira hotu, tanba ho situasaun covid ida ne'e, Laklooan sira iha Dili, nomós balu iha rai liur bele tau hamutuk osan ruma e ohin bele lori apoiu mai ita-nia família afetadu sira”, afirma Samuel Rodriguês Pereira, durante simu apoiu umanitáriu husi ekipa HLA iha fronteira, Lakló ho Dili, sábadu (08/05).

Nia informa, durante mosu inundasaun iha loron (04/04) liubá, rezulta natar komunidade sira-nian barak mak estragu husi korente mota, balu uma bee-sa'e no lori, inklui na'in-lima mak lakon vida.

Koordenadór Halibur Lakló Anan (HLA), António Cárceres de Carvalho dehan, apoiu ai-han ne'ebé sira entrega ba autoridade lokál sira hodi entrega tutan ba família iha item sia.

"Sasán hirak mak hanesan, fós hamutuk 350 sakas, supermie kaixa 100, mina 20 litrus, xinélus 200, sapatu 300, 100 uza ba han iha 100, manta 50, biskuit 10 kaixas, nomos roupa hamutuk 6 sakas", informa nia.

Apoiu hirak ne'e, nu'udár apoiu emerjénsia ida ba vítima sira, no prosesu distribuisaun tomak entrega autoridade lokál sira mak responsábiliza.

Agradese mós ba Association of Chinese Youht Enterpreneurs in Timor-Leste (ACYETL), kompañia BTK, Fortune Star Matadoro, Espoza Jenerál Lere Anan Timor, família sira iha Austrália, Reinu Unidu, Korea Sul nomós iha Dili rasik, ne'ebé fó ona apoiu ba vitima sira iha Lakló.

Entretantu, totál vítima afetadu husi dezastre naturál inundasaun husi suku Uma-naruk, Lakumesak, Uma-kaduak, Hohorai no Laikore, iha postu administrativu Laklo, hamutuk na'in-255.(*)