Print this page

Populasaun Motael hahú hamlaha iha Serka Sanitária

Xefe Suku Motael, Luis António C. G. Viegas ko'alia hela ho www.tempotimor.com iha Suku Motael, sábadu (08/5). Xefe Suku Motael, Luis António C. G. Viegas ko'alia hela ho www.tempotimor.com iha Suku Motael, sábadu (08/5). Foto Tempo Timor

Tempotimor (Dili)-Xefe Suku Motael, Luis António C. G. Viegas, hateten, implementasaun serka sanitária iha kapitál Dili difkulta populasaun balun iha Suku Motael, Postu Administrativu Vera Cruz hahú hamlaha ona.

Tanba, komunidade iha suku Motael ne'e, balun laiha servisu no hala'o servisu privadu iha uma de'it, no balun mak hala'o servisu kompaña (swasta).

"Ko'alia kona-ba situasaun serka sanitária iha fulan hirak liu ba ne'e, sim, tanba ha’u-nia komunidade iha suku Motael, balun mak funsionáriu, balun mós hanesan ema emprezáriu, filafali balun mós servisu hanesan servisu privadu, e balun ita bele dehan katak servisu swasta, ne’ebé ho situasaun ida ne'e, susar duni ba sira, tanba sira balun dala-ruma halerik ba hamlaha duni”, hatete nia ba www.tempotimor.com hafoin partisipa distribuisaun sesta bázika husi Kompaña Lda BROZZ, iha Suku Motael, sábadu (08/05).

Maibé ba kestaun ne'e, autoridade sira mós informa ona ba parte superiór sira liuiu Ministériu Solidaridade Sosial no inkluzaun (MSSI) hodi konsege fó apoiu aihan oituan hanesan fós marka MTCI, Mina, Masin no sabaun ba família hamutuk 110 iha suku Motael.

 "Se la sala iha dia 26 fulan-marsu liu ba, husi parte MSSI apoiu ona hahan umanitáriu, hanesan fós merek MTCI, mina, sabaun ho masin, fó komunidade sira kada saka ida-ida, ne'e ba iha 110 família ne'ebé  tama iha lista da-maen nian”, dehan nia.

Ho situasaun serka sanitária ne'ebé kontinua estende, mak autoridade suku Motael ne'e espera katak MSSI sei bele distribui tan apoiu faze daruak ba kbi'it la'ek sira.

Tanba, aldeia 5 iha suku Motael, mós entrega ona sira nia dadus kona-ba ema ho kategória kbi'it la'ek ba MSSI.

Maske la temi totál númeru ema hirak mak tama liha lista, maibé atu deklara katak kada aldeia entrega dadus total 35 no aldeia balun to'o 40 hodi entrega ba MSSI liuhusi faze selesaun.

Enkuantu totál familia iha suku Motael, hamutuk 1311 no  habitante hamutuk 6759, ne'e kompostu husi aldeia 5. (*)

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com