Xefe Aldeia Liriu, Joana Sarmento hatete, ho implementasaun sesta bazika ne'ebe governu liuhusi kompañia comp.LD BROZZ distribui ba suku Motael ne'e, sei fahe uluk ba komunidade aldeia Liriu.

Ho ida ne'e, husu ba komunidade sira tenke uza máskara, fase liman, no tur distansia, molok ba simu sesta bázika.

"Sim, Ohin ha’u fó avizu ona katak, agora ne'e aldeia liriu mak simu uluk, depois tuir mai sira seluk. ami-nia aldeia ne'e uma kain total, 365 ne'ebé tama ona iha lista. Maibé ohin ha’u mós aviza ona ba sira tenke uza máskara, tur distánsia”, dehan nia ba www.tempotimor.com iha Aldeia Liriu, Suku Motael, sábadu (08/05).

Maibé, iha distribuisaun ne'e, komunidade hamutuk 115 mak hato'o reklmasaun ba autoridade sira, maske antes ne'e sira rejeita la simu subsidiu familia US$200.

"Reklamasaun 115 ne’ebé momentu ne'eba lakoi simu osan US$ 200 tanba rajaun dehan sira-nia salariu boot, entaun mai fali iha sesta bazika ne'e, sira mós iha diretu tenke hetan”, hatete nia.

Ho distribuisaun ne'e, xefe aldeia ne'e husu nafatin ba komunidade sira atu kumpre regra hanesan uza máskara, tur distansia, fase liman hodi nune'e labele hetan difikuldade iha distribuisaun.

"Kona-ba ha’u-nia komunidade sira laiha problema, sira ha’u hatene no koiñese di’ak liu ho sira, e ha’u fó korajen ba taka máskara, no tur ho distansia”, dehan nia.

Iha fatin hanesan Xefe Suku Motael, Luis António C. G.Viegas haktuir, sesta bázika ne'e foin mak tama iha suku motael ba faze dahuluk.

"Sesta Bázika ne'e foin primeira ves tama mai iha Suku Motael. Maibé ohin ai aldeia liriu mak simu uluk”, dehan nia.

Enkuntu aihan sesta bazika ne'e kompostu husi fos, mina, suprermie, susuben, ikan lata inklui seluk tán.(*)