Tempotimor (Dili)-Governu liuhusi Sekretária Estadu Protesaun Sivíl (SEPS), Joaquim Gusmăo dos Reis husu ba vítima Dezastre Naturál (DN) ne'ebé seidauk simu apoiu emerjénsia, bele halo reklamasaun.

Tanba apoiu sira molok ne'e governu fó bazeia ba dadus ne'ebé identifika no rekolla ona husi Xefe Aldeia no Suku sira.

"Ba sira ne'ebé mak dehan seidauk simu, Xefe aldeia, Xefe suku sira sempre kontatu iha ne'ebá, bele halo filafali reklamasaun, ita sei fó apoiu nafatin”, dehan Joaquim Gusmăo iha nia kna'ar fatin, Kaikoli, sesta (07/05).

Iha mós difikuldade ida ba SEPS mak iha komunidade balu ne'ebé afetadu husi inundasaun,laiha kartaun redizénsia husi área ne'ebé sira hela ba.

Tanba ne'e, husu ba autoridade lokál sira hanesan xefe suku no aldeia sira atu identifika hodi buka hatene, karik komunidade sira ne'e, hela duni iha área lokalizadu.

"Sé Xefi Suku, Aldeia sira bele sertifika ida ne'e, bele fó apoiu nafatin”, afirma nia.

Tuir dadus, totál vitima dezastre naturál iha kapitál Dili, ho família hamutuk 33.177, maibé pursentu 41 (41%) husi vítima sira mak governu fó ona apoiu emerjénsia.

"Husi ita-nia família sira ne'ebé afetadu ne'e ita fó ona apoiu ona 41 pursentu, 59 pursentu maka agora ita atu apoiu. Dadus ida ne'e, iha dia 04 Abril, mais agora parese sa'e ona, bele to'o 50 pursentu”, dehan nia.

Komunidade afetadu inundasaun iha aldeia Golgota, Suku Komoro, Filomena de Carvalho sente preukupa, tanba to'o oras ne'e seidauk simu apoiu ruma husi governu, maske dadus sira rejista ona iha Xefe aldeia.

"Ami to'o agora seidauk simu bantuan ruma husi governu, ami-nia naran foin lalais ami hatama ona ba aldeia, mais seidauk hetan apoiu ida. Lahatene bainhira mak atu simu”, kestiona nia.(*)