Tempotimor (Dili)-Ministru Administrasaun Estatal (MAE), Miguel Pereira de Carvalho hatete, governu aloka osan ho montante millaun US$55 iha Orsamentu Rektifikativu ba apoiu família dezastre Naturál.

"Iha orsamentu rektifikativu ne'ebé foin lalais ne'e aprova orsamentu por volta de 55 milhões dolláres Amerikanu atu halo intervensaun fó apoiu emerjénsia nomós apoiu materiál de konstrusaun ba família vítima por volta de 33.176 abitante”, deklara Ministru Miguel iha Farol-Dili, tersa (04/05).

Hafoin informa kestaun ne’e, Ministru Administrasaun Estatal, (MAE) Miguel Pereira de Carvalho hamutuk no Sekretáriu Estadu Protesaun Sivíl, Joaquim José Gusmão dos Reis Martins halo enkontru ho Primeiru Ministru (PM), Taur Matan Ruak, hodi ko’alia kona-ba servisu Ministériu ninian inklui mós ámbitu kalamidade ne'ebé akontese iha rai laran.

"Kalamidade akontese iha fulan kotuk ohin (04/05) halo ba fulan ida Governu rejista família 177 mak afeitdu ba kalamidade ida ne'e no família afeitadu ne'ebé rejista barak liu mak besik porsentu 90% iha Munisípiu Díli”, informa Miguel.

Tuir polítika Protesaun Sívil nian bainhira akontese dezastre naturál Governu foti medida hodi resposta tantu salvasaun no fó apoiu umanitária ba komunidade ne'ebé afeita.

Durante kalamidade iha fulan kotuk ba uma ne’ebé la estraga dadaun família fila ona ba hela maibé familia ne'ebé mak estragu totál oras ne'e sei hela nafatin iha realojadu. (*)