Objetivu husi asembleia jerál ne'e, hodi hili reprezentante sira tuur iha estrutura konsellu nune'e bele lori atividade kooperativa la'o ba oin.
Sekretáriu Estadu Kooperativa (SEKoop), Elizario Ferreira dehan, apresia ho esforsu sira husi kooperativa AIP nian ne'ebé instala tan kooperativa ida hodi ajuda givernu liu-liu sekretária estadu kooperativa.
Nia dehan, governu sei kontinua buka esforsu harii kooperasaun ho nasaun sira seluk ne'ebé iha vizaun hanesan hodi dezenvolve liu tan área kooperativu iha Timor-Leste.
"Moris hanesan ema kooperativizmu ne'e vokasaun ida, presija sakrifisiu. Husu atu imi tenke loke aan, la'os sai hanesan kooperativa ida, maibé ba oin tenke halo sai boot liutan, bele sai asisiasaun ida hodi Halibur munisipiu 12 iha Timor-Leste", dehan SEKoop Elizário, durante partisipa iha asembleia jeral kooperativu AIP nian iha Komoro, sexta (30/04/2021).
Sekretáriu Estadu Ambiente (SEA), Demétrio Amaral dehan, Timor-Leste iha rekursu naturál barak, maibé seiduak dezenvolve ho diak liu-liu iha seitór agrikula.
Tanba ne'e, apresia tebes ho membru sira ho inistiava diak hili dalan ne'ebé loos hodi ajuda ita nia povu Agrikultor, motiva sira hodi badinas hala'o atividade agrikula iha baze.
"Ita-boot sira nia desizaun ne'e kapas tebes, tanba atu halo servisu komun ida, la'os ema ida mesak, maibe presija servisu hamutuk. Parabéns ba membru kooperativa sira hotu, dezeja susesu nafatin ba imi", dehan Demétrio.
Entretantu, Prezidente Kooperativa Agro-Indústria Pioneer (AIP), Rui Castro esplika, kooperativu ida ne'e kria ho objetivu atu motiva no hamoris indústria agrikula, hasae produsaun ai-han lokal, intensifika seguransa alimentar, promove ekonomia sustentável no dezenvolvimentu komunitaria.
"Hakarak loke oportunidade ba parseira ho toos nain, hakiak nain, peskador, ho indústria kreativu hodi promove produsaun agrikula, agroindústria, aguakultura, ho ortikultura", dehan Rui Castro.(*)