Tempotimor (Dili) - Grupu Knua Indústria Kreditu no Formasaun (KIK & F) dadaun ne’e tuir hela formasaun hodi bele hakarak hodi hari’i kooperativa produsaun iha futuru.
Mehi Joventude kreativu hamutuk na’in-21 iha Knua Kréditu ne’e iha hodi reforsa ho formasaun no kapasitasaun bele hamosu grupu kooperativa ida ajuda governu transforma produtu lokál ho teknolójia modernu.
Koordenadór grupu Knua Industria Kréditu no Formasaun (KIK & F), Octaviano da Costa dehan, ho matéria kona-ba kooperativa ne’ebé simu iha formasaun mak sira planeia ona atubele hari'i kooperativa.
"Ami atu aprende klean liután kona-ba lala'ok kooperativa nian. Ami sira ne'e kompostu husi joven hotu kedas, ami iha inisiativa rasik atu hari'i kooperativa ida ho ramu bá kooperativa produsaun nian", hatete nia iha Bairopite, kuarta (28/04).
Kooperativa produsaun foku liu oinsá halo produsaun hanesan transforma produtu lokál ruma ba ho teknolojia atu sai produtu ne'ebé ho kualidade di'ak liután.
"Atu nune'e ema bele konsumu di'ak e ninia tempu durasaun ne'e mós bele kleur liután. Produtu lokál ida ne'e, ita transforma tiha, ita bele rai iha longu prazu", dehan nia.
Maske, durante ne'e sira hala'o ona produsaun, maibé seidauk iha baze legál ida atu hetan legalidade husi governu hodi kontinua produsaun ba oin bele la'o ho di'ak.
"Produsaun kripik. Ami transforma batar ba kripik ho kualidade ne'ebé di'ak liu, atu nune'e ema hothotu bele konsumu ida ne'e", afirma nia.
Ho formasaun ne'e, sira bele hetan informasaun klaru kona-ba valor no prinsipiu sira kooperativa nian, nomós kuñesimentu ba sistema foun kooperativa nian.
"Ami-nia maluk sira ne'ebé seidauk hetan servisu karik, ami bele ajuda sira bele servisu iha fatin ne'e, bele halo produsaun no sira bele hetan atividade ne'ebé sira hala'o", nia argumenta.
Diretora Nasionál bá Kooperativa Produsaun Integrada (DNCPI- sigla Portugés), Jacinta dos Santos dehan, SEKoop nafatin enkoraja katak, joven ne'ebé iha potensia no iha kapasidade ba kreatividade no innovativu, bele hari’i kooperativa rasik.
"Ami fó korajen motiva para sira tenke aprende, tenke la'o di'ak duni, nune'e sira bele hari’i kooperativa ida ne'ebé mak uniku no loos iha sustentabilidade", hateten nia. (*)
