"Ohin ita inaugura Aeroporto Internasionál “Rota do Sândalo”. Lós duni katak iha tempu uluk liu bá negosiante-sira husi rai dook mai iha Timor tamba ‘Sândalo Branco e cor de limão que nasce em uma ilha chamada Timor’. Ita-nia foho nakonu ho ai-kameli ne’ebé hamorin ita-nia rai no lori rendimentu mai tamba nia valor ekonómiku boot loos", dehan PR Lú Olo iha nia diskursu bainhira inagura aeroportu internasional Rote do Sândalo Oe-cusse, Tersa (18/06/2019).

PR dehan ohin ai-kameli iha foho sira hahú lakon nia ezistensia, ne'ebé uluk ai-kameli Timor Leste nian nu'udar paisajen ne'ebé úniku nó hamorin Timor Leste ne'ebé halo ema husi nasaun barak hada'u malu.

 "Ohin ita hateke ba foho sira ne’e ita la hetan ona ai-kameli. Bele ka lae, ita kuda fali ai-kameli hodi hamorin fila fali foho sira ne'ebé hale'u ita, Prezidente Repúblika husik hela dezafiu ida ne’e ba ita hotu", dehan Lú Olo.

Nia dehan liu husi aeroportu ne'e loke dalan ba transporte aéreo hodi hasa'e kresimentu no dezenvolvimentu ekonómiku. Tanba liu husi meiu transporte ne’e sei fasilita integrasaun enklave ida ne’e iha ekonomia rejionál no internasionál no sei oferese oportunidade hodi halo ligasaun ne’ebé importante tebes iha nível nasionál, rejionál no internasionál.

Xefe Estadu dehan aeroporto internasionál Rote do Sândalo sei promove komérsiu, Turizmu no oportunidade atu loke kampu serbisu.

"Turizmu nu’udar atividade ida ne’ebé sei lori dinámika no mobilidade foun ba iha futuru ita-nia rai nian, no hanesan mós atividade ida ne’ebé sei loke dalan hodi diversifika ita-nia ekonomia."

 Aleinde ai-kameli, Lu Olo hatutan, Oekusse mós koñesidu ho ninia tasi-ibun furak, la’o sa’e foho no nia istória relijioza, tanba bee-matan lulik no kaskata sira, tanba nia tahu vulkánika (vulcões de lama) iha Oesilo no nia Foho Leolbatan.

 "Obra-sira ne’ebé halo tiha ona no sira seluk ne’ebé planu atu halo iha mós funsaun turístiku no kulturál, hanesan ita haree ponte mota Tono no Monumentu Lifau nian, besik Aeroporto ida ne’e," katak Lu Olo.

Tuir observasaun, seremonia inaugurasaun ne'e hatudu momos mosu divergensia entre lider FRETILIN ho lideransa AMP no hamosu pergunta status oekuse ninian.

"Oin sa mos projeitu ZEESM ne'e hetan finansiamentu husi governu central. Tan ba ne'e kona ba inauguarasaun ne'e devia koordena didi'ak ho governu central, Timor Leste la'os estadu federal," kritika membru partidu FRETILIN ida ne'ebe dada lia ho Tempo Timor. 

Iha parte seluk Grabiel D. C. C. Soares lamenta tan ba inaugurasaun ne'e la hetan partisipasaun husi eis Prezidente da Republika, Kay Rala Xanana Gusmao no Atual Primeiru Ministru Taur Matan Ruak.

"Ida seluk ZEESM ne'e mosu husi lider sira devia Autoridade ZEESM buka konsulta no koordena ho Governu Central nune'e uluk lider sira hamutuk mak hamosu ZEESM no agora inaugura devia sira hotu hamutuk mas realidade hatudu kontrariu." Grabiel estudante husi Universidade ida iha Dili.