Prezidente komisaun Planu Rekuperasaun Ekonómika (PRE) iha SEKoop, Tomas Gusmăo informa, iha politika rekuperasaun ekonómika, kompaña hamutuk 24 mak sira kontrata hodi distribui ai-han sesta bázika ba populasaun sira.

Maibé, husi kompaña hirak ne'e, iha 11 mak simu ona sira pagamentu, tanba remata ona distribuisaun ai-han ba komunidade sira durante ne’e.

"Iha kompañia hamutuk 11 mak finansas halo ona pagamentu, no 13 seluk mak seidauk tanba distribuisaun seidauk final”, hateten nia ba www.tempotimor.com iha Federasaun Hanai Malu (FHM), kuarta (21/04).

Tuir estimasaun orasamentu ne'ebé uza hodi halo ona pagamentu ba kompaña hamutuk 11 ne'e, ho totál millaun US$12 resin.

Entretantu, iha loron tersa (20/04), Sekretária Estadu Kooperativa (SEKoop), Elizário Ferreira fó sai pursentu 70 (70%) husi kompaña 13 nian mak seidauk simu pagamentu, maibé kompaña 11 seluk Ministériu finansas halo ona pagamentu.

"Ami iha ne'e laiha tiha ona, tanba husi kompaña 24, 11 pagamentu final, 13 pagamentu 70 pursentu, tanba sira nia distribuisaun rasik seidauk termina", dehan nia.

Kompañia hamutuk 11 ne'ebé simu ona pagamentu husi ministériu finansa hanesan, kompaña Ervil, AL, Star World, Urema, Santos, Aitula Unipessoal, Tuli Star, Queson, Maristi, Dear no Atauro Agrobussines, ho totál benefisiáriu hamutuk 159833 ema.

Nune'e mós kompaña 13 ne'ebé seidauk simu pagamentu mak, Aitula, Betuhei, JM, Sheramor, Haksolok, Green Mota Ain, South Rice, RX Impact, Pararel, Hilunorovel, Jumar, Afira, Esquire, no ikus mak Dorravante.

Ho Kompañia hamutuk 24 nee mak durante SEKoop kontrata hodi distribui ai-han ba Munisípiu 7 hanesan, Kovalima, Ainaru, Aileu, Manufahe, Likisá, Manatutu no Lautein.(*)