Sekretáriu Estadu Protesaun Sívil (SEPS), Joaquim Gusmăo dos Reis, agradese no hato'o nia apresiasaun boot ba AEC-TL rasik ne'ebé apoiu governu hodi tulun komunidade.

Durante ne'e iha parseiru barak mak fó ona apoiu ba protesaun sívil, no apoiu hirak ne'e asegura hotu ona iha armájen, hafoin bele distribui ba vítima sira iha kapitál Dili nomós Munisípiu.

"Kona-ba Orsamentu ne'ebé parseiru sira apoiu mai iha protesaun sivíl hamutuk dólar rihun-atusida-nee ($106,000.00), ohin ita simu tan osan rihun-sanolu-resin-lima ($15,000.00), osan ne'ebé mak apoiu ona mai, ita sei uza ba operasionál liuliu ba ita nia Munisípiu sira tanba ita aloka orsamentu ne'e kada Munisípiu hetan $2,500.00", hateten SEPS, Joaquim iha nia kna’ar fatin, kinta (15/04).

Dadaun ne'e sira fahe ona pakote hahán emerjénsia ba família sira, no iha pakote ne'e inklui bee-moos hodi apoiu ba komunidade sira.

"Ita identifika ona entaun sei fahe kedan hahán matak ne’ebé ita konsentra iha sentru apoiamentu ba evakuasaun sira balu mós ita maneja atu fahe mós ba vítima sira”, dehan nia.

Aleinde ne’e, ekipa sira hala'o hela apoiu ba vítima sira tuir SEPS nia oráriu, iha Dili laran hahú kobre ona suku balu ne'ebé afetadu ba inundasaun, tanba ne'e sira nafatin halo servisu bazeia ba rekursu ne'ebé protesaun sivíl iha.

"Husu mós pasiénsia ba ita-nia komunidade sira hein pituan tanba dezastre ne'e ita la espera, ne'ebé akontese ona mai ita maibé iha tempu badak ita halo oinsá mak bele apoiu ba vítima sira hotu", nia promete.

Dadus kona-ba fatin atu halo evakuasaun, ba ema ne’ebé mate no lakon, haruka ona ba Ministériu Administrasaun Estatál (MAE) sei halo hotu apoiamentu ba dadus ne'e hafoin bele fó sai ba publiku.(*)